Kipr prezidenti türklərlə danışığa hazır olduğunu bildirib

Cənubi Kipr Yunan Respublikasının prezidenti Nikos Anastasiadis türklərlə danışığa hazır olduğunu bildirib

Ölkə.Az Reuters agentliyinə istinadən xəbər verir ki, Cənubi Kipr Yunan Respublikasının prezidenti Nikos Anastasiadis Şimali Kipr Türk Respublikasının prezidenti Mustafa Akıncı ilə danışıqları davam etdirrməyə hazır olduğunu bildirib. O, bu qərarını BMT-nin baş katibi Pan Gi Munun telefon zəngindən sonra açıqlayıb. Xatırladaq ki, BMT-nin baş katibi tərəfləri müzakirələr masasına oturmağa dəvət etmişdi.

Anastasiadis bir müddət əvvəl rəsmi Ankaranın protokol qaydalarını pozması səbəbi ilə Türkiyəyə rəsmi səfərini təxirə salmışdı. Agentliyin məlumatına görə, Kipr prezidenti Türkiyə prezidenti Rəcəb Tayyib Ərdoğanın təşkil etdiyi nahar yeməyinə gəlməkdən imtina etmişdi. Buna səbəb isə Şimali Türk Respublikasının Prezidenti Mustafa Akıncının da dəvətlilər arasında olması idi.

Cümə günü Pan Gi Mun ona zəng edərək bildirib ki, BMT-nin Kipr siyasəti dəyişməyib. O, iki lideri Kiprin birləşməsi üzrə işləri sürətləndirməyə, qəbuledilməz status-kvoya son qoymağa çağırıb.

Qeyd edək ki, 1974-cü ildə Yunanıstan Kipr adasını öz ərazilərinə birləşdirməyə cəhd edib. Türkiyənin silahlı müdaxiləsindən sonra adanın 37% türklərin nəzarəti altına keçib. 1983-cü ildə bu ərazidə Şimali Kipr Türk Dövləti yaradılıb. ŞKTD yalnız Türkiyə Respublikası tərəfindən tanınır.

İlhamə
Ölkə.Az