Putindən Türkiyə haqda
Türkiyə ilə münasibətlərin düzəlməsini istəyirik
Ölkə.Az Türkiyə mətbuatına istinadən xəbər verir ki, Rusiya prezidenti Vladimir Putin Yunanıstana iki günlük səfəri çərçivəsində Yunanıstan prezidenti Aleksis Çipras ilə görüşüb. Görüşdən sonra keçirilən mətbuat konfransında çıxış edən V.Putin bildirib ki, Rusiya Türkiyə ilə münasibətlərin düzəlməsini istəyir.
Keçən ilin noyabr ayında Türkiyə Hərbi Hava Qüvvələri tərəfindən Rusiyaya məxsus SU-24 qırıcı təyyarəsinin vurulması iki dövlət arasında gərginliyin yaranmasına səbəb olmuşdu. Bununla bağlı açıqlama verən Rusiya prezidenti deyib: "Türkiyə üzr istəmədi, biz bunu eşitmədik.
Bundan əlavə, vurulan zərərin təzminatı da ödənilmədi. Türklərin də münasibətləri yaxşılaşdırmaq istədiyini eşitdik, biz də bunu istəyirik. Münasibətləri korlayan biz deyilik. Rusiya ilə Türkiyə arasında tərəfdaşlıq və dostluq münasibətlərini yüksək həddə çatdırmaq üçün əlimizdən gələni etdik. Rus və türk xalqları arasında dostluq münasibətləri çox yüksək səviyyədə idi. Biz bunu yüksək qiymətləndirdik. Onların hansı səbəbdən münasibətləri gərginləşdirdiklərini anlaya bilmirəm".
Putin Ankara ilə münasibətlərin yaxşılaşdırılması üçün bəzi vacib addımların atılması zərurətini vurğulayıb:
"Biz Türkiyə ilə fərqli kanallar vasitəsi ilə münasibətlər qururuq. Onlar bizim verəcəyimiz cavabı bilirlər. Biz konkret addımlar gözləyirik. Lakin hələ ki, Türkiyə bu addımları atmır", - deyə Rusiya lideri əlavə edib.
