Azərbaycanlı cazmen Fransada Azərbaycan ruhunu hiss etdirdi
Elçin Şirinov Parisdə “Sen-Jermen-de-Pre” Caz Festivalına Azərbaycan ruhunu gətirdi
Mayın 27-də Parisdə Avropanın aparıcı caz festivallarından biri olan “Sen-Jermen-de-Pre” Festivalında azərbaycanlı pianoçu Elçin Şirinovun etno-caz musiqi üslubunda rəngarəng ifa tərzi maraqla qarşılanıb. Onun beynəlmilləl caz ifaçılarından ibarət triosu 200-dən artıq parisli musiqisevərlər, musiqi tənqidçiləri və Azərbaycanın Fransadakı fövqəladə və səlahiyyətli səfiri Elçin Əmirbəyov qarşısında çıxış edib. Trionun festivalda iştirakı Avropa Azərbaycan Cəmiyyətinin (TEAS) Fransa ofisi tərəfindən təşkil edilib.
Caz mütəxxəsisi və festivalın təsisçilərindən biri Frederik Şarbo tədbiri açaraq deyib: “Artıq üçüncü ildir ki, mən azərbaycanlı caz ifaçısı tərəfindən idarə olunan qrupu böyük məmnuniyyətlə təqdim edirəm. Festivalın əvvəlki illərində, TEAS-ın dəstəyi sayəsində auditoriya azərbaycanlı musiqiçilərin mükəmməl qruplarını dinləmək imkanını əldə etmişdi. Bunlardan birincisi İsfar Sarabski triosu olmuşdu. Bu qrupun lideri hazırda beynəlxalq səviyyədə tanınmış musiqiçidir. Ötən il biz Emil Əfrasiyab və onun kvartetinin çıxışının şahidi olduq. İndi isə mən festivalda iştirak edən yeni pionoçu Elçin Şirinovu təqdim etməyə şadam.”
Azərbaycan xalq musiqisinin zəngin ənənəsindən bəhrələnən Elçin Şirinov yeni nəsil caz musiqiçilərinə aiddir. O, post-bop caz, blüz və fank musiqi elementlərini Azərbaycan xalq və klassik musiqisinin üslub, melodiya və mikrotonları ilə birləşdirir. Tamamilə cazdan fərqli olmasına baxmayaraq, Azərbaycanın milli musiqisi olan muğam yüksək səviyyədə improvizasiya imkanları ilə seçilir. Şirinovun xoş ahəngli improvizasiyaları və pianoda pirotexnik ifası, xüsusilə onun “Gül Açdı” xalq mahnısı ətrafında variasiyaları dinləyicilər arasında olan caz mütəxəssislərini valeh etdi. İki ən məşhur Azərbaycan xalq mahnısı olan “Sarı Gəlin” və “Durna” mahnılarını öz fərdi improvizasiyasını və özünün bəstələdiyi “Həsrət” və “İlham Pərisi” kompozisiyalarını ifa etdi. Bunların əksəriyyətində, o, royalın üstündə idarə etdiyi melodikanın səsindən istifadı edib. Bu, yellə idarə olunan alətdir və akkordiona oxşar səsi var.
Əvvəllər, Elçin Şirinov Azərbaycanın qabaqcıl tenor saksofon ifaçısı olan Rain Sultanovla birgə çalışıb. Həmçinin, hər il keçirilən Bakı Beynəlxalq Caz Festivalında beynəlxalq caz musiqiçiləri ilə yanaşı çıxış edib. Parisdəki çıxışında isə amerikalı zərb ifaçısı Erik Harlandla gözəl vəhdət yaratdı.
Amerikalı pianoçu Brad Mehldaunun rəyi belə olmuşdu: “Elçin həqiqətən trio çərçivəsində ifanı təşkil etməyi çox yaxşı bacarır. Xüsusilə, o, musiqidə piano və bass üçün ayrıca yer tapır. O, bassın artıq çaldığı kənar materialı ifa etmir.”
Harlandın zərb alətində poliritmik ifa üslubu tamaşaçıları coşdururdu. O, Azərbaycan musiqisində dəyişən və qeyri-adi ritmlər olduğuna görə fərqli metrlərdə çalmaq imkanından zövq alırdı. İfaçılar arasında ötürmələr intuitiv olurdu. Harland imkan tapan kimi musiqi bacarığını utalıqla göstərməklə yüksək dərəcədə həssaslıq nümayış etdirirdi.
Elçin Şirinov triosunun ifasından sonra fransalı klarnet ifaçısı Mişel Portal, amerikalı zərb ifaçısı Ceff Ballard və həmyerlimizə dərs demiş amerikalı bass ifaçısı Kevin Haysın birgə çıxışı oldu. Burada fri və fyujn caz və klassik nyuanslar birləşdirilərək hipnotik təsir yaradırdı.
Elçin Şirinov triosu, həmçinin, 26 may tarixində Fransanın Reyms şəhərində yerli “Sunnyside” festivalında konsertdə uğurla çıxış edib.
Elçin Şirinovun innovativ ifasını izləmək üçün www.elchinshirinov.com səhifəsinə daxil ola bilərsiniz.
