Prezidentin ayırdığı vəsaitlə salınan yolda işlər dayandırıldı
Artıq 5 ilə yaxındır ki, salınmasına başlanılan Salyan-Şirvan magistral yolunun tikintisi işi yenə də dayandırılıb.
Ölkə.Az-ın məlumatına görə, bu il martın 4-də Azərbaycan Prezidentinin müvafiq Sərəncamı ilə Sevindik Hətəmov Salyan Rayon İcra Hakimiyyətinin başçısı vəzifəsinə təyin olunandan sonra yarımçıq qalmış Salyan-Şirvan magistral yolunun salınması işi davam etdirilsə də, ancaq təqribən 1 aydan sonra işlər yenidən dayandırılıb.
Hazırda Salyan-Şirvan magistral yolunun təqribən 5-6 kilometri salınıb, qalan böyük hissəsi isə yarımçıq qalıb. Hətta, yolu salan şirkət də bütün texnikaları ilə bərabər ərazidən gedib.
Eyni zamanda Salyan-Şirvan magistral yolunun Yolüstü kəndindən keçən hissəsində böyük yarğan yaradılıb ki, bu da oradan hərəkət edən avtomobillər və insanlar üçün böyük təhlükə yaradır.
Sakinlər deyir ki, yeni icra başçısı tətin olunandan sonra salyan-Şirvan magistral yolunun nəhayət salınıb başa çatdırılacağına böyük ümid yaranmışdı:
“Ancaq 2 aydan çoxdur ki, yolun salınması ilə bağlı heç bir iş görülmür. Gördüyünüz kimi, ərazidə bir dənə də texnika qalmayıb. Yolu salan şirkət işi yarımçıq atıb qaçıb. Şirkət nümayəndələri buradan gedən də dedilər ki, Tahir Kərimov Salyanda icra başçısı olan dövrdə dövlət tərəfindən bu yolun salınması üçün ayrılan vəsait “yeyilib”, yolu salan şirkətə pul ödənilməyib, ona görə də yol tikinti şirkəti işi yarımçıq atıb gedir”.
Məsələ ilə bağlı Salyan rayon Ərazi nümayəndəliyi ilə əlaqə yaratmaq cəhdlərimiz müsbət nəticə verməyib.
Bundan əlavə, Salyan rayon İcra Hakimiyyətinin də məsələ ilə bağlı konkret mövqe bildirməsinə sevinərik.
Xatırladaq ki, uzunluğu 34 kilometr olan Salyan-Şirvan avtomobil yolu keçmiş SSRİ dövründən bəri əsaslı təmir edilmədiyindən bərbad hala düşüb.
Buna görə də bir neçə il öncə ölkə başçısının sərəncamına əsasən Prezidentin Ehtiyat Fondundan Nəqliyyat Nazirliyinə ilkin olaraq ayrılan 2 milyon manat vəsait hesabına yolun əsaslı təmir və tikintisinə başlanılıb, daha sonra isə 3 milyon manat ayrılıb.
Ötən müddət ərzində yolun tikintisi işində tez-tez fasilələr yaranıb. 2015-ci ildə isə hazırlıq vəziyyətinə gətirilən yolun 5 kilometr hissəsinin 2 kilometrində asfaltlama işləri aparılıb.
Elçin Əli
Ölkə.Az
