İrandakı soydaşlarımız ana dilində təhsil alacaqlar

İranda yaşayan milli azlıqlara öz doğma dilində təhsil almaq haqqı veriləcək

Ölkə hökuməti bu haqda artıq müvafiq qərar qəbul edib.

İran Hökuməti ölkədə qeyri-farsların kompakt halda yaşadığı ərazilərdə onların ana dilində təhsil alması üçün təhsil prosesinin təşkili barədə qərar qəbul edib.

Söhbət əsasən kürd və türk dillərindən gedir.

"İran hökuməti artıq müvafiq qərar qəbul edib",- deyə İran prezidentinin dini azlıqların işləri üzrə köməkçisi Əli Yunisi bildirib.

Bu barədə Ölkə.Az İRNA agentliyinə istinadən məlumat verir.

Əli Yunisinin sözlərinə görə, artıq İran Kürdüstanında bəzi məktəblərdə kürd dilində tədris başlayıb, bu praktika ölkənin digər rayonlarında da tətbiq ediləcək.

İranın 80 milyonluq əhalisinin böyük hissəsini qeyri-fars millətlərin nümayəndələri təşkil edir. Əsasən də İranda yaşayan türklər (azərbaycanlılar) ana dilində təhsil almaq üçün illərdir mübarizə aparırlar.

İran Prezidenti Həsən Ruhani seçkiqabağı kampaniya zamanı digər xalqların nümayəndələrinə ana dilində təhsil almaq imkanını yaradacağını vəd etsə də, indiyə qədər bu vədə əməl edilməmişdi.

İlhamə
Ölkə.Az