\"Köçəryan və Babayanın bəyanatları onu deməyə əsas verir ki, yaxın zamanda...\"

Samvel Babayan və Robert Köçəryan erməni ordusunun zəifliyindən və hakimiyyətin səhvlərindən danışıb.

Ermənistanın sabiq prezidenti Robert Köçəryan bildirib ki, artıq iki ildir ki, düşmən ordusu bizə çox problemlər törədir. Çünki bütün silahlarla təchiz edilib. Qondarma “DQR”in keçmiş “müdafiə naziri” Samvel Babayan isə deyib ki, Ağdərə-Goranboy və Füzuli-Cəbrayıl istiqamətlərində Azərbaycan ordusunun ələ keçirdiyi mövqelər strateji əhəmiyyətə malik idi. Həmin ərazilərdən bütün düzənlik - Gəncədən Beyləqana qədər bizim ovcumuzun içində idi. Bakıda çay içəcəyik deməklə iş bitmir ki? Bilirsiniz, Bakıda çay içmək olar, ancaq mən qorxuram ki, onlar tezliklə Yerevana çatacaqlar və burada çay içəcəklər.

Samvel Babayan və Robert Köçəryanın fikirlərinə hərbi ekspert Üzeyir Cəfərov Ölkə.Az-da münasibət bildirib:

"Samvel Babayanın verdiyi müsahibəsində həqiqəti əks etdirən məqamlar da var, həqiqətdən uzaq olan məqamlar da var. Həqiqətdən uzaq olan məqamlardan biri odur ki, Samvel Babayan deyib ki, Azərbaycan iki ehtiyyat briqadası ilə hərəkət edib. Bildirim ki, buna ehtiyac olmayıb. Bunu demək Samvel Babayanın savadsızlığını göstərir. Ehtiyyat briqada yalnız o halda istifadə olunur ki, planda hansısa uğursuzluq olur, əməliyyat baş tutmur. Azərbaycanın ön xəttə olan briqadaları tam hazır vəziyyətdədir. Onların 20-30-% gücündən istifadə olundu.

Samvel Babayan erməni komandanlığının özünə vurğunluğunu deməkdə haqlıdır. Özünə vurğunluq, əminlik onları faciəyə gətirib çıxardı. Köçəryanın özü də etiraf edir ki, Azərbaycanın silahlı qüvələri çox güclüdür. Ermənistan indiyənə qədər görməli işləri görməyib. Düzdür, Köçəryan bunu Serj Sarkisyanın üstünə atmaq istəyir. Köçəryanın indi başqa məqsədləri var. Əgər danışıqlar baş tutsa, Ermənistanda hakimiyyət dəyişikliyi baş verəcək. Hazırda Ermənistanın daxilində çox güclü nüfuz savaşı başlayıb. Kim Serj Sarkisyanı əvəz edəcək? Köçəryan da bu məqamdan istifadə edib, Sarkisyanın səhvlərindən danışır. Ermənilər bir şeyi unudur ki, onları oyuna salan Rusiya, heç vaxt onlara axıra qədər yiyə durmayacaq. Ermənilər peşman olacaqlar. Onlar Azərbaycana qarşı etdikləri hərəkətə görə çox sərt cəzalandırılacaqlar. Ermənilərin ən böyük səhvi onda oldu ki, Azərbaycanla qonşuluq şəraitində yaşamaq əvəzinə Azərbaycana qarşı lazım olmayan iddialar irəli sürməyə başladılar. Bu iddialar da sözsüz ki, onların sonunu yaxınlaşdıracaq.

İyunda növbəti danışıqlar olacaq. Danışıqlar formal olsa da, Ermənistanın daxilində çox ciddi təlatümlər olacaq. Artıq bunun işartıları görünür. Köçəryanın bəyanatı, Samvel Babayanın bu cür danışması onu deməyə əsas verir ki, yaxın zamanda Ermənistanda daxili sabitlik pozulacaq".

Samvel Babayanın "Azərbaycan Naxçıvana müxtəlif İsrail və Rusiya reaktiv sistemlərini yerləşdirib və oradan İrəvanı vura bilər" fikrinə münasibət bildirən Üzeyir Cəfərov bildirdi ki, Samvel Babayan gözəl bilir ki, Ermənistan Azərbaycana qarşı artıq-əskik hərəkət etsə, Azərbaycan çəkinmədən, Rusiya faktoruna baxmadan İrəvanı hədəfə ala bilər".

Səxavət Məmməd
Ölkə.Az