Azərbaycanlı gənc rəssamın Moskvada böyük uğuru
Azərbaycanlı gənc rəssam Əfsanə Həbib Moskvada keçirilən ənənəvi "Ənənə və müasirlik" Beynəlxalq İncəsənət Sərgisinin 10-cu yubiley tədbirinə həsr olunmuş festivaldan qayıdıb.
Ölkə.Az-ın məlumatına görə, mayın 26-31 tarixlərində keçirilən festivalın əsası 2007-ci ildə Moskvada “Mədəniyyətin dəstəklənməsi və incəsənətin inkişafı Fondu” tərəfindən (fondun rəhbəri: Vera Nikolayevna Kiseleva) qoyulub.
Gənc rəssam Əfsanə Həbib də sözügedən festivalda və sərgidə iştirak edib, diploma layiq görülüb. Rəssam festival barədə təəssüratlarını Ölkə.Az-la bölüşüb:
“İlk olaraq onu deyim ki, dünyaca məşhur “Vera” festivalında iştirak etdiyim üçün çox məmnunam. Festivala dünyanın müxtəlif ölkələrindən seçilmiş rəssamlar qatılmışdı. Açılışda Rusiyanın tanınmış simaları və siyasətçiləri, eləcə də dünyanın bir çox nümayəndələri qatılmışdı. Sevindirici hal idi ki, Azərbaycanın Rusiyadakı səfiri Polad Bülbüloğlu da orada iştirak edirdi. O, bizim rəsmlərimizə baxıb xoş sözlər söylədi. Qeyd etməliyəm ki, festivalın təşkilat komitəsinə və münsiflər heyətinə Rusiyanın Xalq rəssamı Zurab Tsereteli, Xalq rəssamı Tahir Salahov, Pyer Karden kimi məşhur şəxsiyyətlər daxil idi. Orada həmçinin mənim sevimli müəllimim, Azərbaycanın əməkdar rəssamı Sakit Məmmədov da qatılmışdı. Azərbaycan ilk illərdən bu festivalda uğurla təmsil olunur. Bu dəfə də orada iştirak etmək bizim qismətimizə düşdü və biz bundan çox məmnunuq”.
Məlumat üçün bildirək ki, dünyaca məşhur olan “Vera” festivalında azərbaycanlı gənc rəssam Əfsanə Həbib batik üzərində “Azad balıqlar”, “İnsan” adlı əsər, “Kloun” əsəri ilə festivalda iştirak edib. Rəssamın kətan üzərində “Pretty woman”, “Qadın” adlı qadın portreti və natürmortu da diqqət çəkib.
