\"Almaniyanın Dağlıq-Qarabağla bağlı mövqeyi də itirilmiş hesab olunur\"

"Almaniya Bundestaqının qondarma erməni soyqırımını tanıması bu ölkənin tarixində bir ləkə kimi qalacaq".

Bunu Ölkə.Az-a Azərbaycan Xalq Cəbhəsi Partiyasının sədri (AXCP) Razi Nurullayev Almaniya Bundestaqının qondarma “erməni soyqırımı”nı qəbul etməsinə münasibət bildirərkən deyib. Onun sözlərinə görə, bu addım nəyinki, Türkiyə-Almaniya, həm də Azərbaycan-Almaniya münasibətlərinə mənfi təsir göstərəcək:

“Doğrusu, Almaniyanın belə bir məsuliyyətsiz addım atacağı heç zaman ağlıma gəlməmişdi. Elə bu xəbəri oxuya-oxuya hoteldən Brüsselin küçələrinə baxıram və elə gözümün önündə bir türk restoranı var. Kifayət qədər mədəni, oxumuş və oturuşmuş türklər var Avropada. Almaniyada isə onların sayı 3 milyondan çoxdur. Təbii ki, Türkiyə Almaniya münasibətləri ciddi zərər görəcək. Dolayısı ilə yox, həm də bu hərəkət Azərbaycan Almaniya münasibətlərinə də təsir göstərəcək.

Bu günə kimi, Almaniya Dağlıq-Qarabağ münaqişəsinin həlli ilə bağlı sözü dinləniləcək bir ölkə sayılırdı. Hətta, Minsk Qrupunun həmsədr ölkəsi kimi də irəli sürülürdü. Almaniya qondarma erməni soyqırımını tanımaqla Dağlıq-Qarabağla bağlı da mövqeyini itirmiş hesab olunur”.

“Avropa anlamaq istəmir ki, bu cığallıq münasibətlərin daha da pisləşməsinə gətirib çıxarır” deyən AXCP sədri qeyd edib ki, 100 il bundan qabaq ölmüş insanların qəbrini qazmaq heç kimə şərəf gətirməz:

“Almaniya, ümumiyyətlə isə Avropa Birliyi ölkələri səhv yoldadır. Əgər onlar həqiqət axtarırlarsa, uzağa getməsinlər. Gözlərinin qabağında ermənilərin törətdiyi Xocalı qətliamı var, bir milyona yaxın məcburi qaçqın və köçkün var. Onları görsünlər. Ermənilərin iddia etdiyi qondarma soyqırımın yüz yaşı, Xocalı qətliamının isə cəmi 24 yaşı var. Ədalətli olmaq istəyirsinizsə, Xocalı qətliamını tanıyın və eyni zamanda Ermənistanın işğal etdiyi Azərbaycan torpaqlarından qeyd-şərtsiz çıxmasını tələb edin”.

Ölkə.Az