AXCP sədri Razi Nurullayev xalqı təbrik etdi
Azərbaycan Xalq Cəbhəsi Partiyasının sədri Razi Nurullayev Ramazan ayının girməsi münasibətilə Azərbaycan xalqına təbrik ünvanlayıb.
Ölkə.Az AXCP sədrinin təbrikini təqdim edir:
“Xalqımızı, bütün dostlarımı, cəmi din əhlini mübarək Ramazani-Şərif münasibətilə təbrik edirəm və onlara diləklərinin hasil olmasını arzulayıram.
Bu müqəddəs ay ilahi rəhmət, əfv və bağışlama üçün mənəvi rahatlıq fürsətidir. Başımızın tacı və dini bələdçimiz Quran'i Kərim də bu mübarək ayda endirilmişdir. Oruc ibadəti mənən və cismən təmizlənmək və ruha qida verməkdir.
Bu ay elə bir aydır ki, milyonlarla müsəlman milyon günlərdən, milyon aylardan ən xeyirlisi olan Qədir gecəsini gözləyir.
Bu ay həm də acların, ehtiyac içində olanların və məhrumiyyətlər yaşayan kəslərin ümid çırağıdır. İftar, təravih və sahur hər bir müsəlmanın fərzidir, amma bu ayda ehtiyacı olanlara kömək etmək daha böyük fərzdir. Belə bir çətin və ağır sosial-iqtisadi durumumuzda, ümid edirəm ki, imkanlı şəxslər pul kilsələrinin və qəlblərinin şəfqət qapısını açacaqlar.
Peyğəmbərimiz Ramazani Şərifdə "Hansı sədəqə əcr baxımından daha böyükdür?" deyə sual edildikdə "Ramazani Şərifdə verilən sədəqə..." buyurmuşdur.
Kaş ki, bu gün xalqımızın sədəqə ummaq yox, başqa ölkələrdə olan müsəlman və qeyri-müsəlman qardaşlarımıza sədəqə vermək imkanı olaydı. Allah-təala Azərbaycana hər şey verib, altı qara qızıl, üstü də, amma xalq kasıb. Arzumdur ki, bu müqəddəs ayda Azərbaycan sosial və iqtisadi bəlalardan qurtarsın, dövlətdə əsas xalqın iradəsi və istəyi keçsin.
Bu müqəddəs ayda səngərlərdə yatıb duran, azğın və mənfur düşməndən torpaqlarımızı qoruyan Azərbaycan əsgərlərinə, zabitlərinə, hərbi mundir geyinən hər kəsə Allahdan cansağlığı və düşmən gülləsindən qorunmağı arzu edirəm. Qoy uca Tanrı onlara sağ-salamat ailələrinin yanına dönməyi nəsib etsin.
Dağlıq-Qarabağ mənfur düşmənin işğalındadır. Bu müqəddəs ay qoy iki onillikdir ki, yurdundan didərgin düşən bacı və qardaşlarımızın öz doğma ocaqlarına qayıtmasına kömək olsun.
Ramazani-Şərifiniz mübarək!”.
