Qazaxıstandakı atışmada ölənlərin sayı 17 nəfərə çatdı

Ölkə.Az BBC-yə istinadən xəbər verir ki, Qazaxıstanın Aktoba şəhərində atışmada ölənlərin sayı 17 nəfərə çatıb.

Bu barədə ölkənin Daxili İşlər Nazirliyi rəsmi məlumat yayıb. Onlardan 11-i hadisəni törədən cinayətkarlar, 3 nəfəri hərbçi, biri silah mağazasının satıcısı, bir nəfər alıcı və bir nəfər mühafizə xidmətinin əməkdaşıdır. 22 nəfər yaralı var.

Hücuma görə məsuliyyəti "Qazaxıstan Azadlıq Ordusu" adlı radikal qruplaşma öz üzərinə götürüb. Bu barədə "Azadlıq" radiostansiyası məlumat yayıb.

Xatırladaq ki, bazar günü hakimiyyətin radikal dini qruplaşma adlandırdığı bir qrup "Pallalda" silah dükanına hücum edərək 17 ədəd tüfəng, 3 qaz tapançası, çoxlu sayda patron və bıçaq ələ keçirib. Hücum edənlər dükanın atıcısını və mühafizəçini öldürüblər. Hadisə yerinə gələn polislərlə atışma zamanı 3 polis yaralanıb və polislərin patrul maşını ekstremistlər tərəfindən ələ keçirilib. Sonra qruplaşma iki dəstəyə bölünüb. Birinci dəstə oğurlanmış polis avtomobili ilə digər silah mağazasına üz tutub.Bu mağazada onlar bir alıcını yaralayıb, digərini öldürdükdən sonra polislə atışmağa başlayıblar. İkinci qrup marşrut avtobusunu zəbt edərək hərbi hissəyə hücum edib. Hərbi hissədə atışma nəticəsində ekstremistlər və hərbçilər arasında ölənlər olub.

Şəhərdə fövqəladə rejim elan edilib. Əhaliyə evlərindən çıxmamaq tapşırılıb.

Qazaxıstan DİN bütün cinayətkarların şəxsiyyətinin müəyyən edildiyini bildirsə də, onların kimliyi barədə açıqlama verməyib.

İlhamə
Ölkə.Az