\"Son 25 ildə dünyada zorakılıq rekord həddə çatıb\"

Ölkə.Az "BBC"yə istinadən bildirir ki, ötən il bütün dünyada silahlı münaqişələrdə ölənlərin sayı son 25 ildə rekord həddə çatıb, qaçqınların sayı isə İkinci Dünya Müharibəsi vaxtından sonra maksimum səviyyədədir. "Global Peace Indexin" reytinq göstəriciləri belə deməyə əsas verir.

Dünyada zorakılığın kəskin şəkildə artmasına birinci növbədə Yaxın Şərqdə baş verən münaqişələr səbəb olub. Həyat üçün ən təhlükəli ölkə Suriya, Cənubi Sudan, İraq, Əfqanıstan və Somali hesab olunub.

Aparılan araşdırmalara əsasən, ötən il terror hücumlarının sayı pik nöqtəyə çatıb, hücumların əksəriyyəti Suriya, İraq, Nigeriya, Əfqanıstan və Pakistan ərazisində baş verib.

Avropa dünyada ən sakit region olaraq qalmaqdadır, bununla belə, mütəxəssislər bildiriblər ki, son 5 ildə Avropa ölkələrində də terror hücumlarının sayı kəskin şəkildə artıb.

Reytinq tərtib edilərkən daxili və xarici amillər, o cümlədən, ölkə daxilində zorakılıq və cinayətkarlıq səviyyəsi, qonşu ölkələrlə münasibətlər kimi 23 vacib amil nəzərə alınıb.

İlhamə
Ölkə.Az