Xorvatiyada baş nazirin istefaya göndərilməsi üçün imza toplanır

Xorvatiya baş nazirinin müavini Tomislav Karamarko bildirib ki, bu gün ölkənin baş naziri Tixomir Oreşkoviçin istefaya göndərilməsi üçün deputatlardan imza toplanması prosesinə başlanılır.

Bu barədə Ölkə.Az "Anadolu" agentliyinə istinadən məlumat verir.

"Bu gün siyasi səhnədə baş verənlərə, qarşılıqlı hücumlara və ağılsız hərəkətlərə son qoymaq lazımdır",- deyə o bildirib.

Karamarkonun sözlərinə görə, indiki koalisiya hökuməti öz funksionallığını itirib.

"Bir sözlə bu vəziyyətə son qoyulmalıdır. Xorvatiyanın belə dözülməz münasibətlər üçün səbri və vaxtı qalmayıb",- deyə baş nazirin müavini vurğulayıb.

O, bu "siyasi oyunda" iştirak edən bütün tərəfləri ciddiyyətə dəvət edib, əks halda hər şeyin fərqli axara yönələcəyi ilə təhdid edib.

İlhamə
Ölkə.Az