\'\'Cavid Osmanov inzibati resurslardan istifadə etməyə çalışır\'\'
“125-lər” siyasi klubu sədrinin sabiq müavini, hüquqşünas Günel Səfərova öz facebook səhifəsində 90 saylı Ağdaş seçki dairəsi üzrə Milli Məclisə keçiriləcək təkrar seçkilərdə dəstəklədiyi namizədin adını açıqlayıb. Lakin məsələ budur ki, G. Səfərova Ümid Partiyasının sədri İqbal Ağazadəni deyil, Yeni Azərbaycan Partiyasının namizədi Cavid Osmanovu dəstəklədiyini b'yan edib: “YAP tərəfindən namizədliyi irəli sürülən Cavid Osmanova seçkilərdə dəstək verirəm və bir gənc kimi onun təmsil etdiyi rayona daha çox töhfə verəcəyi qənaətindəyəm. O, rayonu daha yaxşı tanıyır, yerli sakinlərin problemlərinə bələddir. Əksəriyyət kimi, mən də inanıram ki, Cavid Osmanov Ağdaş üçün daha çox iş görəcək”.
Məsələ ilə bağlı Ölkə.Az-a açıqlama verən “125-lər” siyasi klubunun və Ümid Partiyasının sədr müavini Tamilla Qulami bildirib ki, Günel Səfərova fikirlərində yanılır:
“Öncə qeyd edim ki, Günel Səfərova “125-lər”dən uzun zamandır ki, istefa verib. Həm də bu, onun şəxsi fikridir. Onunla bağlı heç nə deyə bilmərəm. Günel Səfərova yazıb ki, Cavid Osmanov ağdaşlıdır və sakinlərin problemlərindən xəbərdardır. Bildirmək istəyirəm ki, bu belə deyil. Cavid Osmanovun ağdaşlıların problemlərindən heç də xəbəri yoxdur. O, illərdir ki, Ağdaş rayon İcra Hakimiyyəti başçısının birinci müavini vəzifəsindədir, ancaq ağdaşlıların problemlərini həll etməyib. Biz Ağdaşda uzun müddətdir işləyirik və müşahidə edirik ki, yerli əhali ondan xeyli narazıdır. Hazırda da Ağdaşda yerli sakinlər İqbal bəyi dəstəklədiklərini açıq şəkildə göstərirlər. Onlar İqbal Ağazadəyə zəng edib, görüşüb problemlərini bildirirlər. İqbal Ağazadənin özü də onlarla əlaqə saxlayır. Hər gün demək olar ki, İqbal bəy 100-200 nəfər sakinlə əlaqə saxlayır. Reallıq budur ki, Ağdaşda uşaqdan böyüyə qədər hər kəs İqbal Ağazadəni dəstəkləyir. Azərbaycan Demokratik İslahatların İnkişafı Mərkəzi (ADİİM) 2016-cı il iyunun 18-də 90 saylı Ağdaş Seçki Dairəsində təkrar keçiriləcək parlament seçkisində namizədlərin reytinqini müəyyənləşdirmək məqsədilə keçirdiyi sorğudan da göründü ki, respondentlərin 75 faizi İqbal Ağazadəyə səs verəcəklərini bildiriblər. Lakin mən belə deyərdim ki, görünən budur ki, təzyiqləri nəzərə almasaq, Ağdaşda 90 faiz seçici İqbal Ağazadəni dəstəkləyir”.
Məsələ ilə bağlı İqbal Ağazadə isə musavat.com-a bildirib ki, hər kəsin fikrinə hörmətlə yanaşır:
“Hər kəsin seçiminə də fikrinə də hörmətlə yanaşıram. Buna görə də, onun bu fikirləri ilə bağlı heç nə deyə bilmərəm. Ağdaşda seçici-namizəd münasibətləri çox qaneedicidir. Bundan çox razıyam. Ancaq çalışırlar ki, inzibati resursları istifadə etsinlər. Çünki Cavid Osmanov icra hakimiyyətinin birinci müavini işləyib və qeyri-rəsmi olaraq da funksiyasını davam etdirir. Ona kənd icra nümayəndələri, bələdiyyə sədrləri kömək edirlər. Lakin bu, seçiciyə o qədər də effektli təsir göstərmir. Çünki ən azı seçicini bir sual düşündürür ki, on ildir Cavid Osmanov icra hakimiyyətinin birinci müavinidir. O vəd etdiyi işləri elə müavin olduğu zaman görməli idi. Deputat, seçicinin problemlərinin həllini yerli icra strukturlarından qanun çərçivəsində tələb edən və onun yerinə yetirilməsinə ümumi nəzarət edən adamdır. Necə olur ki, adam özü bu vəzifədə olanda problemləri həll etmir, indi məgər tələb edib həll etdirəcək? Seçici bunun fərqindədir və hesab etmirəm ki, Cavid Osmanovu dəstəkləyir, yaxud da onun arxasındadır. Sadəcə olaraq, bir daha qeyd edirəm ki, Cavid Osmanov inzibati resurslardan istifadə etməyə çalışır. Yəqin ki, seçki günü də buna cəhd olunacaq. Ancaq biz də seçki prosesi aparırıq. Bu bizim demokratikləşməyə töhfəmizdir. Azərbaycanda seçici-namizəd münasibətlərində yeni bir müstəvidir. ən azı ağdaşlılar da, oradakı seçicilər də bizim onlara olan münasibətimizi, tezis və mesajlarımızı çox isti qarşılayır. Buna görə də bütün ağdaşlılara təşəkkür edirəm”.