Mirşahinin dişindəki şirə yeri
İntiqam VALEHOĞLU
ANS-in vitse-prezidenti Mirşahin Ağayev bu gün Ölkə.Az saytında dərc olunan və böyük rezonansa səbəb olan "Mirşahinin xanımı Vahid Mustafayevlə mübahisə edib ANS-dən getdi" başlıqlı xəbərə münasibət bildirib. Məlumatı yayan mənbə haqqında etikadan kənar ifadələr işlədib. Açıqlamanın həmin hissəsi Mirşahinə qalsın, digər hissəsini "Qafqazinfo"ya istinadən təqdim edək:
"Səbinə Heydərova hazırda analıq məzuniyyətindədir. Doğrudur, o, bir müddət efirdə “Baş xəbər” verilişinin aparıcısı oldu, amma sonradan ailə vəziyyəti ilə əlaqədar analıq məzuniyyətini bərpa etmək qərarına gəldi. Bu gün də analıq məzuniyyətindədir. Vahid Mustafayevlə hər hansı bir mübahisənin olmasına gəlincə, o, “ANS” Şirkətlər Qrupunun prezidentidir, onunla yalnız yaradıcılıq mövzusunda müzakirə və mübahisə etmək olar. Digər bütün hallarda isə onun əmrləri müzakirə olunmur, icra olunur. Səbinə Heydərova da “ANS”ın çoxsaylı kollektivinin adi üzvlərindən biridir”.
Ardınca əlavə edib ki, sözügedən məlumatı yayan bütün saytları məhkəməyə verəcəklər:
““ANS”in əməkdaşları və rəhbərliyi haqda qeyd edilən məlumatı yayan bütün saytlar qanun qarşısında cavab verəcəklər. Bu gün Hüquq Departamentinə yoxlanmamış məlumatlar yayan saytlarla bağlı məhkəməyə müraciət etmək barədə tapşırıq verilib. Bir daha Kütləvi İnformasiya Vasitələrindən tələb edirəm ki, “ANS” haqda yaydıqları məlumatlarda ehtiyatlı olsunlar. Çünki onlar qanun qarşısında başları ilə cavab verəcəklər. Əgər başları yoxdursa, düşünmək üçün özlərində başqa bir orqan axtarsınlar”.
Deməli, ANS həmin xəbəri yayan saytları məhkəməyə verir. Çox gözəl. Qanun hamı üçün qanundur. Amma indi Mirşahindən əvvəl ANS Şirkətlər Qrupu prezidentinin media üzrə müşaviri Mais Məmmədovun verdiyi açıqlamanı oxuyaq. Məmmədov AzNews.az-a açıqlamasında deyir:
"Sevda Həsənova ailəsində baş verən faciə səbəbindən işə çıxmır. Onun atası rəhmətə gedib. Bununla bağlı olaraq işə çıxmır. Səbinə Heydərovayla bağlı isə heç bir bir məlumatım yoxdur”.
Eyni media qurumu, hər ikisi səlahiyyətli şəxs-biri vitse prezident, digəri media üzrə müşavir və açıqlamalar ortada. Biri deyir ki, xəbərim yoxdur, digəri isə jurnalistin analıq məzuniyyətində olduğunu söyləyir. İndi hansına inanaq? Doğrudanmı bu qurumda son günlər nələrsə baş verir. Gerçəkdənmi, Mirşahinin özünün belə şirkətdən uzaqlaşmaq, yaxud uzaqlaşdırılmaq planları var və bu üzdən özünü Vahid Mustafayevin diqqətinə daha işgüzar, daha nüfuzlu təqdim etmək istəyir.
Anlayıram, ANS son bir neçə ayda məhkəmələrdə xeyli pullar uduzub. İndi o pulları çıxartmaq üçün ən "üzüyola" qurum elə saytlardır. Amma Mirşahin bilirmi ki, həmin saytların aylıq büdcələri ANS-in bir reklamdan götürdüyü gəlirdən azdır? Deyilə bilər ki, məhkəməyə vermək onun haqqıdır. Razıyam. Dostlar, sizə elə gəlmirmi ki, bu məhkəmə çəkişmələri elə Mirşahinin özünü öyrəncəli eləyib. Yəni kim yanında bərkdən asqırsa, məhkəməylə hədələyir.
Açıqlamanın sizə təqdim etmədiyim hissəsini 2-3 dəfə oxudum və məndə belə bir fikir formalaşdı ki, bu şəxs dərin psixoloji sarsıntı yaşayır. Əgər belə olmasa, bir adam niyə küçə uşağının işlədəcəyi ifadələr səsləndirsin ki? Görəsən bu şəxs evdə də belə danışırmı? Bəlkə elə şirkətin özündə də bu cür rəftarları az deyil. Elədirsə, vitse-prezident kimi məsuliyyətli bir postu bu adam niyə daşımalıdır?
Mirşahin hələ bir il öncə də oxşar xəbərə daha pis reaksiya vermişdi. O zaman Mirşahinin xahiş-minnətlərindən sonra həmin yazı çıxarılmışdı. Görünür dişində şirə yeri qalıb. Təki qalan şirənin yeri olsun. Adam Mirşahin olanda nolar? İndi ağzınıza və ağlınıza gələn təhqiramiz ifadələri danışmalısınız? Ayıb deyilmi 53 yaşlı birinə?
Başa düşürəm, müəyyən dairələrdə nüfuz sahibisiniz, lap o nüfuzdan istifadə edib saytları cərimələdə də bilərsiniz. Hərçənd ki, həmin dairələr MTRŞ-nin sizə elədikləri qarşısında aciz qaldılar. Heç olmasa, görün gücünüz saytlara çatırmı? Həmin saytlara ki, MTRŞ "Hesabat"ınızı bağlayanda, ANS-dən saytlara zəng vurub xahiş-minnət edirdilər ki, bizi tək qoymayın, işıqlandırın, ay nə bilim xilas edin. Bax həmin saytlardan biri bizik. Bunu elə-belə vurğuladım, məhkəməyə verməməyiniz üçün deyil. Bir də unutmayın ki, ANS-in devizi "Söyüş alnınıza yazılıb" deyil, "Döyüş alnınıza yazılıb"dır.
Son olaraq: yazdıqlarınızdan daha artıq və daha betər təhqirlər yaza bilərdim. Sizdən fərqli olaraq, oxucumuza və özümə olan hörmətimdən dolayı bunu etmədim. Qoy Mirşahinlik sizdə qalsın, İntiqamlıq məndə!
