5 nömrəli Uşaq İncəsənət Məktəbinin skripkaçılarının konserti dinləyicilərdə xoş təəssüratlar oyatdı
İyunun 7-də”Kapellhaus” Alman-Azərbaycan İctimai Mədəni Birliyində 5 nömrəli Uşaq İncəsənət Məktəbinin skripkaçılarının konserti keçirildi. Konsertin maraqlı, rəngarəng proqramı ansamblın və ayrı-ayrılıqda gənc musiqiçilərin böyük ifaçılıq imkanlarını nümayiş etdirdi.
Karlos Kambezanın “Qadın ətri” filmində səslənən ehtiraslı “Tanqo”, Antonin Dvorjakın oynaq xarakterli “Yumoreska”sı, Arif Məlikovun ilhamlı “İki qəlbin dastanı” baletindən “Kondenin arzuları”, Yohannes Bramsın parlaq “ Macar rəqs”i, bir-birini əvəzləyərək, gənc ifaçıların zəngin daxili aləmini, gözəl musiqi duyumunu üzə çıxardı. Ansamblın ən gənc üzvü (3-cü siniif şagirdi) Ayşən Məmmədova və Xəyalə Abbasova Zurab Merabişvilinin incə, lirik “Vida rəqsi”ni çox gözəl ifa etdilər. Antonio Vivaldinin “İki skripka üçün lya minor konserti”ni ifa edən Rüfət Qubadzadə və Q.Qarayev adina III Respublika müsabiqəsinin diplomantı Məhəmməd Cavadov böyuk istedad və hərtərəfli ifaçılıq məharətini nümayiş etdirdilər.
Proqramın sonunda müasir Norveç bəstəkarı Rolf Lovlandın “Lament for a Frozen Flower” əsərinin ifası ansamblın bədii rəhbəri və dirijoru Zənfirə Bağirzadənin yaradıcı axtarışlarının maraqlı tapıntılarındandır. Fortepiano və skripka üçün yazılmış bu əsər ilk dəfə tar, skripka ansamblı və fortepianonun ifasında səslənməsi yeni çalarlarla diqqəti cəlb etdi. Tar partiyasını məktəbin direktoru Emin Nağıyevin ifa etməsi dinləyicilər üçün sürpriz oldu və onun ilhamlı ifası zala toplaşanları valeh etdi. Konsertdə Mədəniyyət və Turizm Nazirliyinin təhsil və gənclərlə iş sektorunun baş məsləhətçisi Vüqar Baxışov, Mədəniyyət və Turizm Baş İdarəsinin musiqi təhsili və incəsənət sektorunun müdiri Mehriban Qurbanova, “Damyung Qrup Azərbaycan” Koreya və Azərbaycan şirkətlər qrupunun direktorları Lee Jinsoo və Ziya Nağıyev, Azərbaycanın Əməkdar incəsənət xadimi, musiqişünas Sənubər Bağırova, Azərbaycan Əməkdar incəsənət xadimi, bəstəkar Azər Dadaşov iştirak ediblər. Gənc musiqiçilər ifaları ilə musiqisevərlərə gözəl əhval-ruhiyyə bəxş etdilər.
Sonda qonaqlar gənc musiqiçilərlə xatirə şəkilləri çəkdirdilər.
