""Tərəqqi" medalı çiyinlərimizə fərqli bir məsuliyyət qoydu"
Prezident İlham Əliyev Azərbaycan diasporunun inkişafındakı xidmətlərinə görə bir qrup şəxsin təltif edilməsi haqqında sərəncam imzalayıb
7News.az-ın məlumatına görə, xalqlar arasında dostluğun möhkəmləndirilməsi və Azərbaycan diasporunun inkişafı sahəsindəki xidmətlərinə görə Özbəkistandakı Azərbaycan diaspor təşkilatının rəhbəri Məmmədov Mobil Yaqub oğlu “Tərəqqi” medalı ilə təltif edilib.
Mobil Məmmədov 1970-ci ildə Qərbi Azərbaycanda dünyaya gəlib. 1989-cu ildən Özbəkistanda gedərək Avtonəqliyyat İnstitutuna daxil olub. Tələbəlik illərində M.Məmmədov ictimai işlərdə fəal iştirak edir, gənclər təşkilatlarında önəmli mövqe tutmuşdu. 1993-cü ildən isə Azərbaycanın Özbəkistandakı diasporasının qurulmasında yaxın iştirak edir. Hal-hazırda Özbəkistandakı Azərbaycan diaspor təşkilatının rəhbəridir.
Mobil Məmmədovla qısa müsahibəni təqdim edirik:
- Mobil müəllim son qurultayla bağlı təəssüratlarınız necədi?
- Mən mütəmadi olaraq ölkəmizdə diasporla bağlı keçirilən tədbirlərdə fəal şəkildə iştirak etməyə çalışıram. Bugünə qədər bir çox beynlxalq tədbirlərdə, forumlarda iştirak etmişəm. Hesab edirəm bu tip tədbirlər bizim əlaqələrimizi daha da gücləndirəcək. Sonuncu Qlobal Forum isə sözün əsl mənasında diaspor tarixində yeni bir səhifə açdı. Burada biz həm dünyanın bir çox ölkələrində fəaliyyət göstərən diaspor təşkilatlarının nümayəndələri ilə tanış olduq, eyni zamanda, xarici təşkilat rəhbərləri, səfirlərlə, QHR+T və media nümayəndələri ilə ünsiyyət qurduq. Hesab edirəm bu çox önəmli addımdır.
- Cənab Prezident çıışında bir çox məqamlara toxundu. Bu barədə nə deyə bilərsiniz?
- Prezident İlham Əliyev hər zaman olduğu kimi bu tədbirdə də olduqca vacib və strateji məsələri vurğuladı. Ən mühüm məsələ odur ki, Prezident həm problemləri səsləndirdi, həm də bu problemlərdən qurtuluş yolunu bizlərə göstərdi. Diapor təşkilatları ilə bağlı haqlı iradlar səsləndirildi. Hesab edirəm biz bugünkü güclü Azərbaycanla fəxr etməyi bacarmalı, imkanlarımızı düzgün qiymətləndirməliyik. Hesab edirəm səfirliklərlə diaspor təşkilatları bir nöqtədən vurmalıdırlar. Biz birlikdə güclüyük. Əks halda düşmən hər zaman bizdən güclü olacaq.
- Özbəkistanda diaspor təşkilatımızı bugünkü mənzərəsi necədi?
- Siyasi sahədə diasporumuz olduqca aktivdirlər. Təsadüfi deyil ki, Orta Asiyada ilk səfirlik Özbəkistanda ümummilli liderimiz Heydər Əliyevin iştirakı ilə 19 iyun 1997-çi il tarixində açılıb. Bu, diasporamızın inkişafına böyük təkan olub. Ümummilli liderimizin yolunu Prezidentimiz İlham Əliyev xüsusi diqqətlə davam etdirir və axırıncı 5 il ərzində bu ölkədə iki dəfə rəsmi səfərdə olub. 2006-cı ildə ilk səfəri zamanı Prezident İlham Əliyev Daşkənd şəhərində Nizami adına Pedaqoji Universitetin qarşısında qoyulan Nizami Gəncəvinin heykəlinin açılışında iştirak etdi. 2010-cu ildə olan səfəri zamanı isə Prezident Azərbaycanın maliyyə dəstəyi ilə yeni təmir olunmuş Azərbaycan Mədəniyyət Mərkəzinin istifadəyə verilməsində iştirak etdi. Bir məqamı xüsusilə vurğulamalıyıq. Ulu Öndərin vaxtı ilə Özbəkistan dövləti ilə həyata keçirtdiyi xarici siyasətin nəticəsidir ki, dövlətlərarası olan münasibətlər hal-hazırda yüksələn xətt üzrə inkişaf etməkdə davam edir. Onuda qeyd edək ki, Özbəkistan və Azərbaycan türk dövlətləri sırasına daxil olduğu üçün beynəlxalq aləmdə gedən siyası danışıqlarda da bir-birinə arxalanırlar. Təcəvüzkar Ermənistanın paytaxt Daşkənddə səfirliyi yoxdur və hava sərhədləri bu dövlət üçün bağlıdır. Sözün hər mənasında Özbəkistan rəsmi şəkildə bütün qapılarını Ermənistanın üzünə bağlayıb. Bundan başqa Özbəkistan prezidenti İslam Kərimovun Cənab Prezident İlham Əliyevlə şəxsi münasibətləri burada yaşayan azərbaycanlıların da həyatına müsbət təsir etməkdədir. Hər kəs təsdiqləyər ki, məhz Prezident İslam Kərimovun diqqət və qayğısının nətcəsidir ki, bu ölkədə yaşayan azərbaycanlılar Özbəkistanın ictimai-siyasi həyatında kifayət qədər fəallıq nümayiş etdirirlər.
- Bizdə olan məlumata görə Siz həm də Özbəkistan Respublikası dovlət mükafatı - “Dostluq” Ordeni ilə təltif olunubsunuz. Prezident İlham Əliyevin sərəncami ilə “Tərəqqi” medalı ilə təltif olunmağınızı necə dəyərləndirirsiniz?
- Bu bütövlükdə Özbəkistanda yaşayan və diaspor sahəsində şərəflə fəaliyyət göstərən hər bir azərbaycanlıya verilən qiymət idi. Mən Cənab Prezidentlə dərin minnətdarlığımı bildirirəm. Bu medal bizim çiyinlərimizə tam fərqli bir məsuliyyət qoydu. Əminəm ki, biz bu məsuliyyəti layiqincə daşıyacağıq. Mən eyni zamanda Diasporla İş Üzrə Dövlət Komitəsinin rəhbərliyinə, bütün əməkdaşlarına bizə verdikləri dəyərdən dolayı təşəkkür edirik.
