\"Ruslar özlərinə baxsınlar!\"

Ölkə.Az Ermənistan KİV-lərinə istinadən xəbər verir ki, Ermənistan parlamentinin vitse-spikeri Eduard Şarmazanov Rusiya XİN-in rəsmi nümayəndəsi Mariya Zaxarovanın bəyanatına kəskin reaksiya verib.

Xatırladaq ki, Mariya Zaxaraova Ermənistanda general Qareqin Njdenin faşistlərə xidmət göstərməsini əsas gətirərək ona nə üçün abidə qoyulduğunu anlamadığını bildirmişdi.

Ermənistan parlamentinin vitse-spikeri Zaxarovanın fikirlərinə cavab olaraq bildirib ki, "Aleksandr Nevski, Aeksandr Suvorov, Marşal Kutuzov, Baqration rus xalqının qəhrəmanları olduğu kimi, Njde də erməni xalqının milli qəhrəmanıdır".

Deputat Marqarita Esayan isə söyləyib ki, Ermənistanın öz qəhrəmanları, öz tarixi obrazları, öz tarixi var. Kimə harda və nə vaxt abidə qoyulması Ermənistan Respublikasının daxili işidir. Qoy özlərinə baxsınlar, öz tarixlərinə, öz abidələrinə sahib çıxsınlar. Ermənistan tarixinin sahibi biz yalnız özümüzük", deyə erməni deputat vurğulayıb.

İlhamə
Ölkə.Az