"Putin və Obama məni məyus etdilər"

Ölkə.Az "Hürriyet" qəzetinə istinadən xəbər verir ki, Türkiyə prezidenti Rəcəb Tayyib Ərdoğan Barak Obama və Vladimir Putinla münasibətlərin onu məyus etdiyini söyləyib.

O, bir zamanlar Barak Obama ilə Amerika və Türkiyə arasında nümunəvi münasibətlər yaratmaq arzusunda olduqlarını, Rusiya ilə ticarət əməkdaşlığını yeni səviyyəyə çatdırmaq istədiklərini xatırladıb.

"Təəsüf ki, ümidlərimiz doğrulmadı, iqtisadi sahədə əməkdaşlıq yaxşılaşmaq əvəzinə pisləşir, xarici siyasət sahəsindəki münasibətlərimiz də ürəkaçan səviyyədə deyil", -deyə Türkiyə lideri vurğulayıb.

Ərdoğan Obamanın siyasətini tənqid edərək Quantanamo həbsxanası ilə bağlı problemin həll olunmamasının narahatlıq doğurduğunu söyləyib. O, həmçinin Vaşinqtonun Suriyada kürd müxalifətçilərinə dəstək göstərməsi faktından da narazılığını ifadə edib.

"Amerikanın kürdlərə verdiyi silahın yarısı sonradan İŞİD-in əlinə keçir, bundan da türk xalqı əziyyət çəkir. Bu cür faktar bizi məyus edir",- deyə Ərdoğan bildirib.

Ərdoğanın sözlərinə görə, Suriyada baş verənlərdə yalnız Obamanı günahlandırmaq olmaz.

"Mən əlbəttə Obamadan daha qətiyyətli addımlar gözləyirdim və yenə gözləyirəm"

Putinlə münasibətlərə də toxunan Ərdoğan deyib: "Bizim Putinlə dostluğumuz ikitərəfli münasibətləri çox yüksək səviyyəyə qaldırmağa imkan vermişdi. Çox təəssüf ki, Türkiyənin hava məkanını pozan rus təyyarəsinin vurulmasından sonra vəziyyət kökündən dəyişdi. Rusiya ilə münasibətlər pozulana qədər iki ölkə arasında ticarət dövriyyəsi ABŞ-la olan dövriyyəni üstələyirdi",- deyə o bildirib.

Sonda Türkiyə prezidenti ikitərəfli münasibətlərin tezliklə yaxşılaşacağına ümidvar olduğunu bildirib.

İlhamə
Ölkə.Az