Zərdüştilərdən qorxunc adət

İranın 30 əyalətindən biri olan Yezddə zərdüştilər yaşayır.

Ölkə.Az Hürriyyət qəzetinə istinadən xəbər verir ki, bu əyalətdə çox qədim tarixə malik Səssizlik qülləsi ölkəyə gələn turstlərin marağına səbəb olur. Zərdüşt inancına görə torpaq və hava müqəddəsdir, insan onu kirlətməməlidir. Bu səbəbdən də Zərdüştilər 2500 il ərzində ölülərini torpağa basdırmaqdan və ya yandırmaqdan imtina ediblər.

Zərdüşt inancına görə, ölən insanın bədəninə şeytan daxil olur. Bədənin şeytandan azad olunması üçün onu quşlara yem edirdilər.

Onlar ölənlər üçün Səssizlik qüllələri adı verilən (başqa bir adı Dakme) xüsusi bir qala inşa etmişdilər. 3 mərtəbəli qalanın ən üst mərtəbəsində kişilərin, orta mərtəbədə qadınların, ən alt mərtəbədə isə uşaqların cəsədləri yerləşdirilirdi. Qülləyə hər insan daxil ola bilməzdi. Bunun üçün "nasel" adlanan xüsusi xidmətçilər ölənlərin nəşini qalaya gətirir, ətrafdakı qartallara yem olaraq qoyub gedirdilər. Qalada toplanıb qalan sümüklər isə ayrıca bir otağa yığılır, toz halına gəldikdən sonra dənizə və ya suya buraxılırdı.

Ölənin ruhunun yaxşı və ya pis olmasını anlamaq üçün qartalın onun ilk olaraq hansı gözünü didməsini izləyirdilər. Qartal birinci sağ gözü yeyirdisə, ölənin ruhu yaxşı, sol gözünü yeyirdisə, yaman olaraq qiymətləndirilirdi.

Bu adət 1960-cı illərə qədər İranda qalmaqda idi. Ölkədə bu adətə qadağa qoyulduqdan sonra atəşpərəstlər torpağa təmas etməsin deyə ölənlərini beton məzarlarda dəfn etməyə başladılar. Səssislik qüllələri isə hələ də 2500 illik bir inancın yadigarı kimi yaşamaqdadır.

Eyni adət Tibet dağlarında yaşayan insanlar arasında da mövcuddur. Lakin burada məsələ torpağı və ya havanı müqəddəs hesab eləməklə əlaqədar deyil. Himalay dağlarında daşlar içərisində məzar qazmaq mümkün olmadığına görə, onlar ölülərini parçalayaraq qartalların önünə atırlar.

İlhamə
Ölkə.Az