Rasim Musabəyov: “Əslində, İran Azərbaycanla saziş imzalayaraq, əmin mövqeyimizə şərik olur”

Millət vəkili, politoloq Rasim Musabəyov Azərbaycan və İran hökumətləri arasında Araz çayı üzərində “Xudafərin” və “Qız Qalası” hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında saziş imzalanmasına münasibət bildirib.

Deputat R.Musabəyov Ölkə.Az-a açıqlamasında deyib ki, bu sənəd işğal altında olan həmin ərazilərin boşaldılmasına əminlik yaradır:

“İran tərəfi bu məsələ ilə bağlı çoxdandan bəri Azərbaycana müraciət edirdi ki, bu vacib və əhəmiyyətli layihə olduğu üçün, bunun icrasına başlamaq lazımdır və sairə. Halbuki, həmin ərazilər Ermənistanın işğalı altında olan torpaqlarımızdır. Ancaq indi bu layihənin icrasına başlanması ilə bağlı Azərbaycanın razılıq verməsi həm də Ermənistana mesajdır. Yəni, Azərbaycan tam əmindir ki, o torpaqlar gec-tez işğaldan azad olunacaq. Əslində, İran tərəfi də Azərbaycanla bu sazişi imzalayaraq, rəsmi Bakının əmin mövqeyinə şərik olur. Eyni zamanda bu saziş Ermənistanın həmin torpaqları əbədi olaraq işğal altında saxlayacağı düşüncələrinə zərbədir”.

Elçin Əli
Ölkə.Az