İqbal ağazadənin Seçki Qərargahı Ağdaşda təbliğat kampaniyasını davam etdirir
İyun ayının 2-sində İqbal Ağazadənin Seçki Qərargahı Ağdaş şəhərinin mərkəzində qapı-qapı təbliğat kampaniyasını davam etdirib.
Sakinlər ilə görüşən qərargah üzvləri seçicilərə minlərlə təbliğat materialları paylayıb, namizədlə bağlı əlavə məlumatlar verib, seçiciləri 18 iyunda seçkidə iştirak etməyə və İqbal Ağazadəyə səs verməyə çağırıblar. Ağdaşlılar adət və ənənlərinə sadiq qalaraq qərargah üzvlərini çox mehriban, qonaqpərvərliklə və isti qarşılayıblar. Bu günə qədər digər ərazilərdə aparılan təbliğat öz effektini verməkdədir. İqbal Ağazadənin təbliğat materiallarında yazdığı şəxsi telefonuna artıq gün ərzində yüzlərlə seçici tərəfindən zənglər gəlir. Seçicilər ona öz dəstəklərini ifadə edərək İqbal Ağazadənin parlament fəaliyyətindən xəbərdar olduqlarını deyir və bildirirlər ki, o, hər zaman parlament kürsüsündən xalqın problemlərini deyib və onların həll olunmasına çalışıb. Seçicilər artıq öz namizədlərini müəyyənləşdiriklərini bildiriblər və açıq olaraq bəyan edirlər ki, İqbal Ağazadəyə səs verəcəklər.
Hakimiyyət namizədinin “Ağdaşdan ağdaşlı seçilməlidir!” şüarını irəli sürərək bölücülük və ayrıseçkiliklə məşğul olması isə seçiciləri hiddətləndirib. Onlar qeyd edirlər ki, bu artıq ölkədə yenidən "yerlibazlıq" yaratma halıdır və bu hal ölkəni bölgələrə bölməkdir. Seçicilər bu bölücü düşüncənin YAP namizədinə başqa destruktiv dairələr tərəfindən dedizdirilməsi qənaətindədirlər.
Sakinlər rayonda olan əsas problemlərlə bağlı da qərargah üzvlərini məlumatlandırıblar. Bəlli olub ki, bu rayonda yol, işıq, qaz və içməli su problemləri ciddidir. Bəs Cavid Osmanov illərlə I müavin olduğu müddətdə kəndlərin bu problemləri ilə niyə maraqlanmayıb? Bəzi seçicilər isə ümumiyyətlə Cavid Osmanovu tanımadıqlarını bildiriblər.
Qeyd edək ki, təxribatçılar da yenə öz işlərindən qalmayıblar. DSK-nın rəsmi təşviqat lövhəsinə vurulan təbliğat materiallarını cırıblar. Lakin diqqəti cəlb edən haldır ki, artıq təxribatların qarşısı da elə seçicilərin özləri tərəfindən alınır və bu hərəkətləri törədənlər ciddi qınağına tuş gəlir. Artıq hər kəsə məlumdur ki, bu təxribatlar rayon icra hakimiyyətinin ərazi idarəetmə və yerliözünüidarəetmə orqanları ilə iş şöbəsinin müdiri Əsgərxan Həsənov və namizəd Cavid Osmanov tərəfindən təşkil olunur və bu haqda MNSK sədrləri və DSK-nın sədrinin də məlumatı var, amma qarşısını almaq üçün heç bir tədbir görmürlər.
