Rusiyadakı faciə ilə əlaqədar 5 nəfər həbs olundu

Kareliyadakı Syamozero faciəsi ilə bağlı 5 nəfər tutulub

Ölkə.Az Rusiya KİV-lərinə istinadən xəbər verir ki, Rusiyanın Syamozero gölündə uşaqların həlak olması barəsində iş üzrə daha bir təlimatçı, 1997-ci ildə anadan olmuş Valeri Krupnodelsikov həbs edilib.

Bu barədə Rusiya İstintaq Komitəsinin rəsmi nümayəndəsi Vladimir Markin "Vesti-FM" radiosunun efirində məlumat verib. Beləliklə, 5 nəfərə qarşı ittiham irəli sürülüb. Daha əvvəl "Park otel "Syamozero" MMC-nin direktoru Yelena Reşetova, onun müavini Vadim Vinoqradov, habelə təlimatçılar Regina İvanova və Lyudmila Vasilyevanın saxlanıldığı bildirilmişdi. İstintaq əvvəlcə 14 uşağın həlak olması barədə məlumat versə də, Rusiya Federasiyası Prezidenti yanında uşaq hüquqları üzrə müvəkkil Pavel Astaxov 15 nəfərin cəsədinin tapıldığını söyləyib. Kareliyanın başçısı Aleksandr Xudilaynen daha sonra bildirib ki, hazırda 13 yeniyetmənin həlak olması məlumdur, daha bir uşağın axtarışları davam edir.

Həlak olmuş 13 uşağın cəsədi iyunun 20-də səhər saatlarında xüsusi reyslə Moskvaya gətirilib. İyunun 20-si Kareliyanın və Moskvanın hakimiyyət orqanları tərəfindən matəm günü elan edilib.

İlhamə
Ölkə.Az