\"Mado\" müştəriləri Montenegroda rafting adrenalini yaşadı

Montenegronu sakit istirahət seçənlərlə yanaşı, həyəcan, ekstrim və adrenalin sevərlər üçün də ən uyğun ölkə saymaq olar.

Dünyanın ən dərin və coşqun kanyonlarından biri də Montenegroda yerləşən Tara kanyonudur. Biz də Madonun daimi müştəriləriylə birlikdə bu möhtəşəm kanyonu həm ziyarət etmək, həm də adrenalin dolu anları yaşamaq üçün yollanırıq həmin kanyona.

3 saatlıq yol ərzində möhtəşəm dağların arasıyla baxmağa doymayacaq qədər gözəl kəndləri, qəsəbələri keçirik. Yolun yarısında Piva çayının sahilində bu gözəllikləri həm seyr etmək, həm də bu anları ölümsüzləşdirmək üçün dayanırıq. Yolda satılan dağ balının da dadına baxmağı unutmuruq.

Qısa müddət sonra Montenegronun ən hündür zirvələrindən birinə çatırıq. Xüsusi rafting formalarımızı geyindikdən sonra kiçik maşınlarla çay kənarına yola düşürük. Artıq 8 nəfərlik qayıqlar bizi gözləyir.

Nəzarətçimizlə bərabər çayda kürək çəkərək coşqun sularda 2 saat yol qət edirik. Çayın sərin və dupduru suyu isə bizi yerimizdə saxlaya bilmir. Bütün turistlərlə bərabər suya atlayaraq kanyonda üzməyin dadını çıxarırıq.

Qarşımıza çıxan şəlalədə isə fotolar çəkdirərək, təklif edilən dadlı içkilərlə 35 dərəcə istilikdə cənnəti yaşayırıq.

Qayıqlarla səfəri başa çatdırmaq nə qədər bizi kədərləndirsə də, səfər sonrası bizim üçün hazırlanmış yerli kənd yeməkləri əhval-ruhiyyəmizi daha da gözəlləşdirir.

Anlayırıq ki, belə gözəl ölkə sayəsində cənnəti bu dünyada da yaşaya bilərik.