Sulinin kişisi, Elzanın qızı, Səmranın sponsoru, ehtiyaclı xalq artisti
Jurnalist İntiqam Valehoğlunun müəllif layihəsi olan "Həftəbecər"i (84-cü say) təqdim edirik.
Həftələr irəlilədikcə "Həftəbecər"in daimi oxucularıyla dostlaşdığımı zənn edirəm. Bəzən isə lap son cümlədə yazı yazdığımın fərqinə varıram. Mənə elə gəlir ki, hər həftənin birinci günü yığışıb söhbətləşirik, şou və mədəniyyət aləmində baş verənləri birgə müzakirə edirik. Elə indicə hiss edirəm ki, oxuculardan biri başımın üstündə dayanıb. Deyir ki, buradan sevdiyim qıza salamlarımı yaz. Mən də xəyali olaraq ona deyirəm ki, qardaşım, bu, səninçün Mikayılın verilişi deyil axı, Bərdənin Dəymədağıldı kəndindən tutmuş, Lerikin Züvüç kəndinə qədər olan bütün dost-tanışların adını çəkim. Elə ad çəkəsi olsam, birinci sevimli aşıq, son günlərin ən çox danışılan ismi Telli Borçalıya salamlarımı göndərərdim də. Sonra da birdən işim düşər, toya-məclisə çağırası olarıq. O da olmasa, məhkəməyə zada verəndə bir üzümüz olar ki, gürcüstanlılar demişkən, "o ərziyi geri götürsən" söyləyə bilək. Yeri gəlmişkən, Tellinin özündən 10 yaş böyük qardaşı var - aşıq Tərmeyxan. İnandırım sizi ki, bu saat Azərbaycanda o səviyyədə 3-4 aşıq ya ola, ya olmaya. Düşünün, adam deyir ki, səsgücləndirici olan məclislərdə iştirak etmək mənlik deyil. Yəni saz ancaq canlı ifa olunmalıdır, heç bir qoşqusuz, səsgücləndiricisiz. Bu arada T.Borçalı mətbuata açıqlamasında haqqındakı informasiyaları mediaya sızdıranlar haqda xoşagəlməz sözlər işlədib. Bilməsən, deyərsən ki, kənd yerində su suvarmaq üstündə bir-birini qıran iki kişinin söhbətidir ha. Yəni səviyyə o qədər yüksəkdir.
Bir osetin (bəzi mənbələrə görə gürcü) əsilli müğənni var idi - Suli. Çoxdandı yoxa çıxmışdı Suli. Elə şou bulağında təzəcə islanmışdı ki, sulu-sulu yoxa çıxdı. İndi yenidən qayıdıb. Deyir ki, həyatımın kişisini tapdım, ərə getdim, indi də səhnəyə qayıdıram. Sənətçinin bu addımını təqdir edirəm. Həyat nədir e, buradakı sənətçilərin çoxu elə həyətdən birini tapan kimi ilim-ilim yoxa çıxırlar, sən yenə bir az şükürlüsən. Necə deyərlər, işin avand olsun, a Suli xanım.
Xalq artisti Bilal Əliyevin bekarçılıqdan əziyyət çəkdiyini bilirdim, amma ta beləsini düşünməmişdim. o boyda sənətkar durub-durub saçına rəng qoyan kişi müğənnilərini tənqid edib. Əşşi, rəhmətliyin nəvəsi, bu tənqidçilərin, yazarların işidir e. Axırda bir cümlə işlədib. Amma bilmirəm, bu cümlə də "bir milyona toya gedirəm" söhbətidir, yoxsa gerçəkdənmi belə bir şey olub.
"Xaricdə dostlarım var ki, gecə yarısında zəng edir ki, hesabına 20 min pul qoyacam, bir az oxu. Oxumuşam, qoyublar da".
Bilal müəllim, yenə siz yaxşısız e, gecə yarısında oxuyub pul qazanırsınız. Sənətçilərin yarıdan çoxu gecə yarı olmamış elə oyunlardan çıxırlar ki. Bəh-bəh. Oyun deyirəm e, sizə. Almaniya-İtaliya oyununda heç belə dram yaşanmayıb.
İndi təqdim edəcəyim xəbəri ürək ağrısıyla yalan olar, amma dərin təəssüf hissiylə təqdim edirəm. Ötənlərin məşhur diktoru, bir zamanlar insanların küçədə görüb sevindiyi, bir salam verməyi özünə fəxr bildiyi sənətkar, xalq artisti Sabir Ələsgərov maddi problemlərin girdabında qıvrılır. Deyir ki, hələ tamam sağalmamışam:
"Bir gündən bir xəstəxanaya gedirəm, qanımı yoxlayırlar, böyrəyimdəki çirki təmizləyirlər. Çirki yuyub qurtarandan sonra yenə də əməliyyat edəcəklər. Digər əməliyyatlardan artıq 3 ay keçib, ancaq yenə də ağrılarım səngimir, çirk azalmır. Qanımda bir az kreatin çoxalıb, onu aşağı salmaq istəyirlər. Müalicəm üçün pul lazımdır. Hər dəfə həkimə gedəndə cibimin son qəpiyinə kimi xərcləyirəm. Məcbur qalıb, qohumlardan, tanışlardan borc alıram. Başqa çarəm yoxdur. Birtəhər dözürəm, görüm, axırı necə olacaq. İndiyə kimi heç kəs kömək etməyib, heç kəsə də buna görə müraciət etməmişəm. Özüm prezident təqaüdü alıram. Qohumlar da hərdən yanıma gələndə yastığımın altına 50-100 manat qoyurlar. Yenə də əsas güc öz üzərimizdədir, Allahın verdiyi candır, qorumaq, yaşamaq istəyirəm".
Hər halda, düşünüləsi durumdu. Ömrünün əlli ildən artığını həsr etdiyi televiziya bu barədə düşünsə, məncə, pis olmaz. Kim bilir sabah bizi hansı xəstəliklər gözləyir".
Müğənni Könül Kərimova da gözəllik salonu açıb. Xaricdə müğənnilər masaj salonu açır e, toba. O gün oxudum. Bizimkilər də o xəbərə özümüzə məxsus tərzdə şərhlər yazmışdılar. Salonun da çox maraqlı adı var - "Könül dünyası". Nooldu, bəyənmədiniz? Pis addır? Siz də hər şeyə bir mız qoyursunuz e. Bəs nə qoysun, "Cabbar dünyası"? Gül kimi ad qoyub da.
Elza Seyidcahanın qızının boyunun balaca olmağını sosial şəbəkədə müzakirə ediblər. Bircə kəlmə yazıblar ki, boyu çox balacadır, vəssalam. Elzanın qızı da həmin adama yazıb ki, bizim bu yaxınlarda qızımız olacaq, siz hələ bizi müzakirə edirsiniz, geridə qalmısınız. Başa düşürəm e, insanları fiziki çatışmazlıqlarına görə tənqid etmək, yaxud ələ salmaq yolverilməzdir. Amma burada ələ salınası bir şey yazılmayıb axı. Amma "geridə qalmısınız" sözü əməkdar artist fəxri adını daşıyan birinin övladına yaraşan fikir deyil. İnsafən, oxucu da doğru etməyib. Elzanın qızını o oğlana zorla ərə verməyiblər ki.
Ay dostlar, ay tanışlar, bəlkə siz biləsiniz, bu Səmraya bir sponsor tapılmadımı? Əşşi vallah, bu yazıq qızın dərisi çıxdı e, fotosessiya elətdirməkdən. İndi də sinəsini göstərib. O gün görmüşdük də. Guya tez-tez görəndə nəsə yenilik olur?(Milli.Az)
