AVRO-2016-nın SOCAR-ın biznes inkişafı üçün yekunları təqdim edildi
Xəbər verildiyi kimi, iyulun 9-da Parisdə Azərbaycan Mədəniyyət Mərkəzində SOCAR-ın təşkilatçılığı ilə qəbul keçirilmişdir.
SOCAR prezidenti Rövnəq Abdullayev, FİFA prezidenti Ciani İnfantino, digər rəsmi şəxslərlə yanaşı futbol əfsanələri Ruud Qullit və Kristian Vierinin də iştirak və çıxış etdikləri qəbulda SOCAR AVRO-2016 ilə tərəfdaşlığının yekunlarını təqdim etmişdir.
Bildirilmişdir ki, SOCAR son illərdə xam neftin qiymətinin aşağı düşdüyü şəraitdə belə, həyata keçirdiyi çoxşaxəli investisiya və marketinq strateqiyası nəticəsində gəlirliliyini təmin etmişdir. Azərbaycana və Avropa ölkələrinə qoyulan sərmayələri şaquli inteqrasiya prinsipinə əsasən şaxələndirməklə şirkət öz biznesinin inkişafı və ölkənin rifahı üçün möhkəm zəmin yaratmışdır.
Son illərdə SOCAR xarici ölkələrdə mənfəət gətirən törəmə şirkətlər qurmuş, bunun da nəticəsində nəhəng transmilli şirkətlər sırasında yer tutmağa nail olmuşdur. Azərbaycan Respublikası Dövlət Neft Şirkəti Avropa bazarında həyata keçirdiyi əməliyyatların davamlı olmasında maraqlıdır. AVRO-2016 kimi möhtəşəm kütləvi tədbir vasitəsi ilə SOCAR brendinin tanıdılması məhz bu məqsədə xidmət etmişdir. Reklam kampaniyası nəticəsində SOCAR məhsullarının beynəlxalq bazarlarda satış həcmi, ilkin hesablamalara görə, 30%-a qədər yüksəlmişdir.
Televiziya kanalları və canlı izləmələrdə milyardlarla müştərinin diqqəti dəfələrlə SOCAR brendinə cəlb olunmuşdur ki, bu da gələcəkdə şirkətə məxsus məhsulların bazarlara çıxarılması üçün möhkəm zəmin yaratmışdır. Parisdə SOCAR-ın azarkeşlər zonasına bir milyondan çox ziyarətçi daxil olmuşdur. Yalnız sosial şəbəkələrdə SOCAR-ın paylaşımlarını müxtəlif ölkələrdən olan 90 milyona yaxın istifadəçi izləmişdir. Marketinq sahəsində əldə edilmiş bu nailiyyətlərin yalnız SOCAR-ın AVRO-2016 kimi möhtəşəm bir tədbirlə tərəfdaşlığı sayəsində mümkün olduğu vurğulanmışdır. Çempionatın sonunda SOCAR-ın Portuqaliya yığmasının gənc futbolçusu Renato Sançezə təqdim etdiyi “Yarışın Gənc Oyunçusu Mükafatı” ən çox diqqət cəlb edən məqamlardan biri olmuşdur.
SOCAR xarici bazarlarda biznesini inkişaf etdirmək, brendini tanıtmaq və bununla Azərbaycan xalqının mənfəətini davamlı şəkildə, təmin etməklə yanaşı, AVRO-2016-nın futbol sevincini azərbaycanlı azarkeşlərə yaxınlaşdırmaq üçün də bir sıra xüsusi layihələr həyata keçirmişdir. Bakı Olimpiya Stadionunda qurulan “Azarkeşlər zonasında” ilk dəfə olaraq, hamı üçün tam açıq formatda 5 minə yaxın futbolsevərə yarımfinal və final oyunlarında futbol bayramının sevincini birlikdə yaşamaq üçün imkan yaradılmışdır.
Ən gənc azarkeşlərimiz SOCAR tərəfinidən Çempionatın final oyununu Parisin Stad de Frans stadionunda izləməyə dəvət olunmuşlar. Əsasən öz liqalarının bombardirləri olan, Sumqayıt, Siyəzən, Gəncə, Mingeçəvir və Ağsu şəhərlərinin yetirmələri həyatlarında ilk dəfə Avropanın mərkəzində, Parisdə Avropa Çempionatının final matçının həyəcanını canlı yaşamışlar. 9-13 yaşlı Bəhlul, Ümid, Sadiq, Əfqan, Jalə və Selcana bu unudulmaz anları bəxş edən SOCAR-ın prezidenti Rövnəq Abdullayev stadionda onların qarşısına çıxmış və uşaqları şəxsən salamlamışdır. AVRO-2016 fürsətindən istifadə edərək, SOCAR bu layihə ilə ölkəmizin bütün uşaq futbolçuları üçün stimul yaratmaq və Azərbaycan futbolunun inkişafına yeni bir təkan vermək məqsədini qarşısına qoymuşdur. Avropadan Azərbaycana iqtisadi mənfəət gətirən SOCAR ölkəmizin gələcəyi olan uşaqların təhsil, idman və sosial inkişaf layihələrini də özünün ən vacib sərmayəsi və sosial məsuliyyətinin ən mühüm aspekti kimi görür.
