\"Hesab edirəm ki, bu çox düzgün və yerində olan bir qərardır\"

ABŞ prezidentliyinə ən şanslı namizədlərdən sayılan Hillari Klinton seçiləcəyi təqdirdə vitse-prezident postuna NATO-nun Avropadakı qoşunlarının keçmiş baş komandanı admiral Ceyms Stavridisi gətirmək istədiyini bildirib.

Keçmiş baş komandanın vitse-prezident olacağı təqdirdə nələrin baş verəcəyi maraqla gözlənilir.

Bununla bağlı hərbi ekspert Üzeyir Cəfərov Ölkə.Az-a danışıb:

"Hillari Klinton prezident olacağı təqdirdə dünyada müsbətə doğru çox böyük dəyişiklik olacaq. Prinsip etibarı ilə əsrlərlə dövlətçilik ənənəsi olan ABŞ-ın oturuşmuş siyasəti, idarə sistemi var. Bir dəfə ABŞ siyasətində öz sözünü demiş xanım birinci rolda çox işlər görə bilər. Ona çox güclü komanda lazımdır. Hillari Klinton yaxşı bilir ki, XXI əsrdə çox ciddi hadisələr baş verəcək və verir, ona görə də vitse-prezident postuna dünyadakı proseslərin həm siyasi, həm də hərbi tərəfini bilən bir şəxsi gətirməyə qərar verib. Hesab edirəm ki, bu çox düzgün və yerində olan bir qərardır.

NATO-nun Avropadakı qoşunlarının keçmiş baş komandanı admiral Ceyms Stavridis bir sıra siyasi danışıqların, proseslərin içərisində olub. Vitse-prezident postunda isə onun ABŞ-ın ikinci şəxsi kimi həm proseslərə təsir göstərmək imkanı olacaq, həm də proseslərə təkan verəcək.

Bir qədər qəribə səslənsə də, Hillari Klinton prezidet seçiləcəyi təqdirdə keçmiş komandan müharibənin içərisindən çıxmış bir şəxs olaraq yeni müharibələrin yaranmasını istəməz".

Səxavət Məmməd
Ölkə.Az