Səhnəmizin ən qocamanları: 70-i aşırdın, 100-ə nə qaldı?

Səhnə gözəlliyi sevir və heç şübhəsiz ki, sənət adamları da gözəl, baxımlılıq, yaşlarından gənc görünmək üçün necə deyərlər, dəridən-qabıqdan çıxırlar. Bəzən onlar bunun üçün qazandıqlarının yarısını xərcləməli olurlar, bir çox hallarda isə estetiksiz, əməliyyatsız yaşlarından gənc görünənlər olur. Yəqin ki, indi adını çəkəcəyimiz sənətçilərin təvəllüdləri sizin üçün də maraqlı olacaq.

Beləliklə, Ölkə.Az hazırda karyerasını davam etdirən və yaşı 70-dən yuxarı olan sənət adamlarının siyahısını təqdim edir:

Əfsanəvi sənətkar Zeynəb Xanlarova 28 dekabr 1936-cı ildə anadan olub. Səksən yaşı olan canlı əfsanə tez-tez olmasa da, xaricdə və ölkəmizdə ara-sıra solo konsert proqramlarıyla çıxış edir.

Xalq artisti Flora Kərimova isə 23 iyul 1941-ci ildə doğulub. Yetmiş beş yaşlı sənətkar bu gün də yeni mahnılar yazdırmaqla formada olduğunu göstərir.

Xalq artisti Niyaməddin Musayev isə 1940-cı ilin may ayının 1-də İmişli rayonunda anadan olub. Yetmiş altı yaşlı Musayev son zamanlar efirlərdə az-az görünsə də, toy məclislərinə tez-tez dəvətlər alır.

Xalq artisti Səməd Səmədov 1946-cı il sentyabrın 17-də Aşqabadda anadan olub. Cəmi iki ay sonra 70 yaşını qeyd edəcək Səmədov indi də fəaliyyətdədir.

Əməkdar artist Cavan Zeynallı 1945-ci ildə dünyaya gəlib. 71 yaşlı ifaçı nadir hallarda efirə çıxsa da, restoranlarda çalışır.

Muğam ifaçısı, xalq artisti Canəli Əkbərov 1940-cı ildə anadan olub və hazırda fəaliyyətini davam etdirir.

Ondan iki yaş böyük olan digər xalq artisti Arif Babayev isə ara-sıra oxumaqla yanaşı, pedaqoji fəaliyyətlə də məşğuldur.

Əlibaba Məmmədov isə sözün bütün mənalarında muğam sənətimizin sonuncu mogikanıdır. Səksən yeddi yaşlı ustad sənətkar bu gün də fəaliyyət göstərir. Məmmədovun fəaliyyətinin əsas hissəsini pedaqoji fəaliyyəti təşkil edir.