"Qarpız festivalı, dolma festivalı keçirmək əvəzinə ciddi iş görmək lazımdır"

Rusiyanın Xarici İşlər naziri Sergey Lavrov Azərbaycana rəsmi səfər etdi.

Səfər ərəfəsində ABŞ-ın Dövllət katibi Con Kerrinin də Rusiya səfər edəcəyi bildirilirdi. Lavrovun Bakı və Kerrinin Moskva səfəri zamanı əsas mövzulardan biri də, Dağlıq Qarabağ probleminin həlli məsələsidir.

Bu ərəfədə isə Ermənistan prezidenti Sarkisyan bildirib ki, əgər hansısa bədlikdən Dağlıq Qarabağ lap bircə günlüyə Azərbaycanın tərkibində olsa, orada bir erməni qalmayacaq.

Baş verən son proseslərlə bağlı politoloq Adıgözəl Məmmədov Ölkə.Az-a danışıb:

"Son zamanlar Rusiya tərəfinin Dağlıq Qarabağ münaqişəsinin həlli məsələsinə qoşulmasının şahidi oluruq. Bəzi politoloqlardan fərqli olaraq, danışıqlar barədə məlumat verə bilmərəm. Ona görə ki, danışıqların predmeti sirrdir və bu barədə heç bir məlumatım yoxdur. Nədənsə bizim bəzi çoxbilmiş politoloqlarımız danışıqların müzakirə predmetlərini gündəmə çıxarırlar. Bu sirr xarakterli danışıqların detallarını politoloqlarımıza kim verir? Görünən odur ki, Rusiya siyasi elitasının və şəxsən Putinin Dağlıq Qarabağ münaqişəsinin həlli barədə çox ciddi səyləri var. Bu kontekstdə Lavrovun İrəvana və Bakıya səfərinin şahidi olduq. Əslində Rusiya tərəfi bu problemin həlli istiqamətində ciddi addımlar atmaq istəyirlər. Bizim politoloqlar danışıqlar barədə fikir söyləyəndə bu fikirlər Rusiya və erməni mətbuatında işıqlandırılır. Onlar isə elə bilir ki, danışıqlar ictimaiyyət arasında, hamının gözü qarşısında baş verir. Əslində bu belə deyil. Hazırkı status kvo-nun qorunmasında maraqlı qüvvələr var. O qüvvələr Dağlıq Qarabağ münaqişəsinin həllini istəmirlər. Buna görə də, biz ehtiyatlı olmalıyıq.

Ermənilər deyir ki, biz tarixən türklərlə düşmən olmuşuq, onlarla bir yerdə yaşaya bilmərik. Biz deyirik ki, Dağlıq Qarabağ Azərbaycan ərazisidir. Azərbaycan daxilində ermənilərə ən yüksək status verməyə hazırıq. Ermənilərin hər yerdən əlləri üzülüb, sığındıqları nöqtə odur ki, biz tarixi düşmənik, biz onlarla bir yerdə yaşaya bilmərik. Dağlıq Qarabağda yaşayan ermənilər Qarabağ xanlığının tərkibində yaşayıblar. 1804-cü ildə ruslar Gəncəni işğal edəndən sonra Qarabağ xanlığı müqavilə ilə rusların hakimiyyəti altına keçdi. O zaman Dağlıq Qarabağ muxtariyyəti yox idi. Bir qrup erməni var idi, onlar Qarabağ xanlığının tərkibində yaşayıblar. Xanlıq ərazində yaşayan ermənilərin böyük hissəsi ilə Qarabağa köçmə olublar. Ermənilər illərlə bizim torpaqlarda və hakimiyyətimiz altında yaşayıb, indi bizlə bir yerdə yaşaya bilməyəcəklərini deyirlər.

Ermənilər deyir, türk bizim düşmənimizdir. Bu absurddur. Ermənilərin dediyi qondarma soyqırım zamanı Osmanlının 7 naziri əslən erməni olub. Dağlıq Qarabağdan çıxan hərbi elita Ermənistanda hakimiyyəti ələ alıb. Onlar hazırkı status kvo-nun qorunmasında maraqlıdırlar. Bizim QHT-lər, fondlarımız bu yöndə addımlar atmalıdırlar. Yoxsa qarpız festivalı, dolma festivalı keçirirlər".

Səxavət Məmməd
Ölkə.Az