Kasıb toyuna getməyən sənətçilərin vergi borcları nə qədərdir?

Xatirinizdədirsə, təxminən iki ay əvvəl saytımızda "Kasıb toyundan imtina edən sənətçilər: "ATV-dən çəkiliş də gətirirəm" — GİZLİ SÖHBƏT" başlıqlı yazı dərc olunmuşdu. Yazıda şərti müştəri olan Qəbələ sakini Kamran (yəni müəllif) səkkiz sənətçinin bütün toya və yarım saatlıq ifa üçün hansı qonorarı tələb etdiyini öyrənmişdi.

İndi isə Ölkə.Az həmin sənətçilərin bu ilin birinci rübü ərzində ödədiyi verginin məbləğini toy qonorarları ilə müqayisəli şəkildə təqdim edir.

Xalq artisti Səməd Səmədovun köməkçisi bildirmişdi ki, müğənni adətən rayon toylarına 10 min manata gedir. Amma bu dəfə güzəşt edərək, 8 minə məclisi idarə edə bilər. İndi görək Səməd Səmədov (Səmədov Ağasəməd) nə qədər vergi ödəyib:
"Qeydiyyat kitabında göstərilən toy sayı real görünür, lakin qeydiyyat kitablarında hər toya düşən gəlirin orta məbləği 1-ci rübdə 56 manat, 2-ci rübdə isə 157 manat göstərilib. Bununla belə, 1-ci rüb üzrə özü tərəfindən təqdim edilən bəyannamədə gəlirlərini bəyan edib, vergisini hesablayıb, lakin çox az bir hissəsini ödəyib (hesablanan məbləğin 10%-dən az bir hissəsini). Hazırda 5000 manata yaxın borcu var".

"Xalq ulduzu" müsabiqəsinin qalibi Eldəniz Məmmədov isə əməkdaşımıza 7 min manat qiymət "oxumuşdu":

"Mən özüm 7 mindən aşağı gələ bilmərəm. Tək özüm gəlsəm, 3 mindən aşağı yeri yoxdur".
Görək Eldəniz Məmmədov ilin birinci rübündə neçə məclisdə iştirak edib və borcu varmı? Sənətçinin birinci rübdə cəmi 1 toyda çıxışı qeydiyyat kitabına salınıb, bir toya düşən gəlirin məbləğini 1000 manat göstərib ki, bu da real deyil:
"Birinci rüb üzrə özü tərəfindən təqdim edilən bəyannamədə gəlirlərini qismən bəyan edib, vergisini hesablayıb və ödəyib. Hazırda təsdiqlənmiş borcu yoxdur".

Üçüncü həmsöhbətimiz "Azəristar"ın qalibi Vaqif Şıxəliyev idi. Şıxəliyev Qəbələdə toy oxumaq üçün şərti müştəridən dörd min manat istəmişdi:

"Min manat da düşərəm, 4 minə ansamblımla gələrəm, böyük bir avtobus tutub gələrik, yüksək səviyyədə idarə edərik. İnanın, sizə Bakıdakı qiymətimi dedim. İstəsəniz, Bakıdan bir qız oxuyanı da gətirərəm. Orada normal musiqiçilər varsa, gələ bilərəm. Toy həyatda bir dəfə olur da, qoy keyfiyyətli bir şey olsun".
Lakin Vaqif Şıxəliyev birinci rübdə qeydiyyat kitabında çıxış qeydə almayıb. 1-ci rüb üzrə özü tərəfindən təqdim edilən bəyannamədə gəlirlərini qismən bəyan edib, vergisini hesablayıb, lakin ödəməyib.

"Yeni ulduz"un laureatı Sevinc Musayeva musiqiçilərlə 5 min manata məclisi idarə edə biləcəyini söyləmişdi. Tək gələcəyi halda isə 2500 manat qonorar tələb etmişdi. Musayevanın 1-ci rübdə qeydiyyat kitablarında çıxışı qeydə alınmayıb, lakin vergi orqanlarına təqdim etdiyi bəyannamədə cüzi bir məbləğdə gəlir bəyan edib, ona uyğun vergisini hesablayıb. Ödədiyi məbləğ də çox azdır.

Xuraman Şuşalı (Hüseynova) isə iki minə tək özünün məclisdə iştirak edə biləcəyini demişdi. Həmin məbləğin iki qatı ödəniləcəyi təqdirdə, Hüseynova ansamblını da özüylə gətirə bilərmiş. Şuşalının 1-ci rübdə qeydiyyat kitablarında çıxışı qeydə alınmayıb, 1-ci rübdə vergi orqanlarına bəyannamə təqdim etməyib, heç bir ödəniş aparmayıb.

Əməkdar artist Yaqub Zurufçunun qonorar məbləğini isə köməkçisi bu cür açıqlamışdı: "Yaqub bəy bir saata öz orkestri ilə 5 min, sizin orkestrlə 3 minə oxuyacaq". Amma sənətkar ümumiyyətlə müğənni kimi vergi qeydiyyatında deyil.

Müğənni Vasif Məhərrəmli ansamblla toya 10 minə, tək 5-6 minə getdiyini bildirsə də, birinci rübdə cəmi 2 toyda çıxışı qeydiyyata salınıb, 1-ci rüb üzrə özü tərəfindən təqdim edilən bəyannamədə gəlirlərini qismən bəyan edib, vergisini hesablayıb, lakin ödəməyib. 2-ci rübdə qismən ödənişlər aparıb, hazırda 2800 manata yaxın borcu var.

Müğənni Bahar Lətifqızı (Şahverdiyeva) bütöv məclisi 2500, məclisin 1 saatını isə 1500 manata oxuyur. Bu məbləğ sənətçi məclisdə ansamblsız iştirak etdiyi halda ona verilir. Ansamblla onu məclisində görmək istəyənlər isə 5 min manat ödəməlidirlər.

Bahar Lətifqızının (Şahverdiyeva) birinci rübdə az sayda çıxışları qeydiyyata salınıb, bununla belə, 1-ci rüb üzrə özü tərəfindən təqdim edilən bəyannamədə gəlirlərini bəyan edib, vergisini hesablayıb, onların da yarısını ödəyib. 2-ci rübdə ödənişlər aparıb, hazırda təsdiqlənmiş borcu yoxdur.

İntiqam VALEHOĞLU
Ölkə.Az

Qeyd: “Yazı Mətbuat Şurasının və Vergilər Nazirliyinin “Azərbaycanın vergi sistemi yeni iqtisadi inkişaf mərhələsində” mövzusunda fərdi yazı müsabiqəsinə təqdim olunmaq üçün verilir.