Nitsa terrorçusunun şəxsiyyəti müəyyən edildi
Nitsada “Bastiliya qalasının alınması” bayramı münasibəti ilə atəşfəşanlığı seyr etməyə toplaşmış kütləni əzib keçən yük maşının sürücüsünün şəxsiyyəti məlum olub.
Ölkə.Az-ın “RİA Novosti”yə istinadən verdiyi xəbərə görə, yük maşınını idarə edən şəxs 31 yaşlı Tunis əsilli Nitsa şəhər sakini Məhəmməd Lahuyec Buhlel olub. Bu barədə yerli “Nice Matin” nəşri xəbər yayıb.
“iTele” telekanalının məlumatına görə, qeyd olunan şəxs xırda qanun pozuntularla əlaqədar hüquq-mühafizə orqanlarının nəzarətində olub. Lakin, onun terrorçularla əlaqədə olması indiyədək qeydə alınmayıb.
Xəbər verildiyi kimi, Nitsa şəhərində sürətlə hərəkət edən yük maşını bulvarda “Bastiliya qalasının alınması” bayramı münasibəti ilə atəşfəşanlığı seyr etməyə toplaşan insanlara çırpılıb. Hücum nəticəsində 80 nəfər ölüb.
İlhamə
Ölkə.Az
