Böyükağa Hacıyev: ""Viktoriya"nı keçmək "Qarabağ"a problem olmayacaq"

Azərbaycanın tanınmış futbol mütəxəssisi, əməkdar məşqçi Böyükağa Hacıyev "Qarabağ"ın Çempionlar Liqasının III təsnifat mərhələsindəki rəqibi ola biləcək Çexiya "Viktoriya"sı barədə danışıb.

Ölkə.Az-a danışan mütəxəssis qeyd edib ki, Çexiya təmsilçisi kifayət qədər ciddi rəqibdir, amma "Qarabağ" da zəif deyil:

"Hesab edirəm ki, dörd komandamızdan növbəti mərhələyə yalnız "Qarabağ" adlayacaq. Bu komandanın oyunu, sərgilədiyi futbol digərləriylə müqayisədə köklü şəkildə fərqlənir. Onlar öz işlərini sizdən də, məndən də yaxşı bilirlər. Fikrimcə, "Viktoriya"nı keçmək "Qarabağ" üçün problem olmayacaq".

Xatırladaq ki, "Qarabağ" II təsnifat mərhələsinin ilk oyununda Bakıda Lüksemburq "Düdelanj"ını 2:0 hesabıyla məğlub edərək növbəti mərhələyə vəsiqəni böyük mənada təmin edib.

İntiqam VALEHOĞLU
Ölkə.az