"Bu qiyam türk ordusunu dünyanın gözündən saldı"
Dünən gecə gözlənilmədən Türkiyədə hərbi çevrilişə cəhd oldu
Ordunun bir hissəsi Ankara, İstanbul, Sakaryada dövlət binalarını ələ keçirib hərbi çevriliş etdiyini bəyan etdi. Bundan bir qədər sonra isə Ərdoğan xalqa müraciət edərək küçələrə səslədi və küçəyə çıxanlar ordunun üzərinə yeridilər. Çox keçmədən hakimiyyət çevrilişin qarşısının alındığını bildirdi.
Türkiyədə baş verən hərbi çevrilişlə bağlı Milli Təhlükəsizlik Nazirliyinin istefada olan polkovnik-leytenantı İlham İsmayıl Ölkə.Az-a danışıb:
"Baş verən hərbi çevriliş gözlənilməz hadisə idi. Ərdoğan iqtidarı dönəmində ordunun yüksək rütbəli adamları ordudan kənarlaşdırılıb, həbs olunmuşdu. Ordunun baş qərargah rəisi və Jandarma komandiri Ərdoğanın öz adamı idi. Ona görə də, hərbi çevriliş gözlənilmirdi. Ordunun bütöv hissəsi yox, bir hissəsi hakimiyyət çevrilişinə cəhd etdi, xüsusən də, Hərbi Hava Qüvvələri.
Bu hakimiyyət çevrilişindən çox şouya bənzəyirdi. Buna çox bəsit şəkildə yanaşılmışdı. Əgər bu hakimiyyət çevrilişi ilə Atatürkün demokratiyasını qaytarmaq istəyirdilərsə bu belə olmamalı idi. Bir vaxtlar Türkiyədə Kənan Evrən hakimiyyət çevrilişi edəndə bu normal qarşılanmışdı. Avropa İttifaqına üzv olmaq istəyən Türkiyə kimi dövlətdə hərbi çevriliş cəhdi Türkiyənin nüfuzunu aşağı saldı.
Bütün TV-lərdə türk əsgərinin, zabitinin əllərini göyə qaldırıb, təslim olmasını göstərirlər. Bu görüntülər Türkiyə dövlətinə və ordusuna böyük zərbədir. Əsgərlərin şalvarlarını çıxartdırıb təslim etmələri Türkiyə silahlı qüvvələrini gözdən saldı. Ərdoğan bunun üçün nə qazanacaq bilmirəm, ancaq Türkiyənin daxili və xarici düşmənləri Ərdoğandan daha çox qazanacaqlar. Bu görüntüləri göstərməklə Türkiyənin ən qürurlu yeri-ordu demək olar ki, məhv oldu. Bu ordunun sabah bölgədə nüfuzu da olmayacaq. Ordunun güc nümayiş etdirməsi də, bilinməyəcək. Artıq türk əsgərini zəif bir əsgər biləcəklər. Bu oyunun ən böyük zərbəsi birbaşa orduya dəydi. Ərdoğan bu işdən rəqiblərinə qarşı, azad mətbuata qarşı maksimum yararlanacaq. Ərdoğanın xarakterində bu var.
Çox təəssüf ki, hər şeyi demokratiya pərdəsi altında edirlər. Radikal islamçılar terror edəndə bunu islam bayrağı altında etdikləri kimi, çevrilişin qarşısının alınmasını demokratiya bayrağı altında etdilər. Hesab etmirəm ki, demokratiya qorundu. Mən çevrilişin deyil, sivil hakimiyyət dəyişikliyinin tərəfindəyəm. Çevrilişin qarşısı alınıb, ancaq bunu bu qədər şouya çevirmək lazım deyil. Bu məsələni təcili bağlayıb, məhkəmənin ixtiyarına vermək lazımdır. Deyirlər, türk xalqı demokratiyanın tərəfində oldu. İnanmıram ki, demokratiyanın tərəfində olanlar küçələrə çıxmışdılar. Bu heç inandırıcı deyil. Küçəyə kütlə çıxmışdı, islamçılar çıxmışdı. Küçədəkilər ancaq "Allahu Əkbər" deyirdilər.
Türk ordusu və dövləti zəif düşdü. Baş verən hadisələrin nəticəsi budur".
Səxavət Məmməd
