“Sevil” MTK-nın rəhbəri həbs olunub

Bağlanan tikinti şirkəti haqda yeni sensasion məlumatlar; Minlərlə vətəndaşın milyonlarla pulunu mənimsəməkdə suçlanan “Sevil Massivi”nin rəhbəri Aynur Zeynalov gizli vəhhabi məscidi inşa etdirirmiş; bu qalmaqalda Abşeronun icra başçısı Zakir Fərəcovla Hökməli bələdiyyəsinin sədrinin adları da hallanır

Baş Prokuror yanında Korrupsiyaya Qarşı Mübarizə Baş İdarəsi “Sevil” MMC-nin rəhbəri Aynur Zeynalovun barəsində həbs-qətimkan tədbiri seçib. El arasında Hacı Aynur kimi tanınan bu şəxs külli miqdarda ziyan vurmaqla dələduzluq etməkdə ittiham olunur. Barəsində 3 aylıq həbs-qətimkan tədbiri seçilən A.Zeynalov hazırda Bakı İstintaq Təcridxanasında saxlanılır.

Redaksiyamıza daxil olan məlumatda bildirilir ki, Korrupsiyaya Qarşı Mübarizə Baş İdarəsinin “Sevil Massivi” MTK-da qəfil yoxlamalara Korrupsiyaya Qarşı Mübarizə Komissiyasından verilən tapşırıqla başlanıb. 

Bu tapşırığın mübhəm səbəbi olub. Belə ki, dövlət orqanlarına “Sevil”in inşa etdirdiyi “Sevil Massivi Yaşayış Kompleksi”ndə vəhhabi təriqətindən olan şəxslərin toplaşması haqda məlumatlar daxil olub. Araşdırmalar zamanı bəlli olub ki, massivdə vəhhabilər nəinki çoxluq təşkil edir, hətta Aynur Zeynalov da bu təriqətin ardıcılıdır və ən əsası ərazidəki çoxmərtəbəli binaların olduğu ərazidə gizlin şəkildə vəhhabi məscidi inşa olunmağa başlayıb! Bu məsələ aydınlaşandan sonra “Sevil” MTK-da yoxlamalara “yaşıl işıq” yandırılıb. İlkin olaraq MTK-ya vergi yoxlaması göndərilib. Yoxlama zamanı bir çox yeyinti hallarının olması, bir torpağın bir neçə nəfərə satılması faktları ortaya çıxıb. Bu məlumatlar araşdırılması üçün Korrupsiyaya Qarşı Mübarizə İdarəsinə göndərilib. Və əməliyyat planı hazırlanaraq MTK-da qəfil yoxlamalar başlanıb. 

Qaynağımız deyib ki, həmin vaxt Türkiyədə istirahətdə olan “Sevil” MTK-nın rəhbəri Aynur Zeynalov Bakıya çağırılıb və hava limanında saxlanılaraq nəzarət altında Korrupsiyaya Qarşı Mübarizə İdarəsinə aparılıb, orada ona ittiham elan olunaraq barəsində həbs-qətimkan tədbiri seçilib. Həmin gün saxlanılan digər şəxs Hökməli bələdiyyəsinin sədri Mirnemət Mirəziz oğlu Miradıyev olub. Bir qədər əvvəl “Tərəqqi” medalı ilə təltif olunmuş M.Miradıyev Vergilər Nazirliyinə çağırılıb. Heç nədən xəbəri olmayan bələdiyyə sədri Vergilər Nazirliyində sorğu-sual olunaraq Korrupsiyaya Qarşı Mübarizə İdarəsinə aparılıb. M.Miradıyevin bu məsələyə aidiyyəti isə “Sevil” MTK-ya Hökməli bələdiyyəsinin balansında olan hektarlarla torpaq sahəsini ayırması olub. Bundan başqa, M.Miradıyev ərazidə qanunsuz tikintilərin aparılmasını, xüsusən vəhhabi məscidinin tikilməsini himayə etməkdə suçlandırılıb. M.Miradıyev istintaqda dindirildiyi zaman Abşeron Rayon İcra Hakimiyyətinin başçısı Zakir Fərəcov dövlət orqanlarına bələdiyyə sədrinin azad edilməsi üçün müraciətlər edib. Son nəticədə siyasi rəhbərliyi inandıra bilib ki, M.Miradıyevin vəhhabi təriqətinə aidiyyəti yoxdur, onun bu işə qol qoyması sadəcə tamahından irəli gəlib. Bundan sonra sinəsi “Tərəqqi” medallı bələdiyyə sədrini azad ediblər. 

Aldığımız digər bir məlumata görə, “Sevil” MTK-nın saxlanılan mühasibləri, menecerləri, iş icraçılarına da ittiham elan ediləcəyi gözlənilir. 

Qeyd edək ki, iyulun 21-də MTK-nın baş ofisindən və yaşayış massivindən reportaj hazırlamışdıq. 

Həmin reportaj zamanı müxbirimiz yaşayış massivinin girişində post qoyulduğuna və içəri heç kimin buraxılmadığına şahidlik etmişdi. 

Aldığımız son məlumatda yaşayış kompleksindəki vəhhabi məscidi binalar üçün ayrılmış meydançanın ərazisində olub. Binalardan yalnız ikisinin özülü tökülsə də, həmin məscid sürətlə tikilirmiş. A.Zeynalovun həbsi, işçilərinin saxlanılmasından sonra isə məscid gecə ilə sökülüb. Biz ərazidə olarkən tikinti meydançasında sökülmüş binanın qalıqlarının şahidi olmuşduq. Mühafizəçi həmin tikilinin “düzgün inşa edilmədiyinə görə” söküldüyünü deyib.

Belə görünür ki, hakimiyyət nümayəndələri vəhhabi təriqətindən olan qruplaşmanın nəzarətində, üstəlik, mühafizə olunan və gözdən iraq bir ərazidə məscid olmasına qarşıdır.

Maraqlı məqamlardan biri də budur ki, “Sevil” MTK-da məlum əməliyyat ərazinin qonşuluğunda yerləşən Müşfiqabad qəsəbəsindəki məsciddən vəhhabi icmasının qovulmasından az sonraya təsadüf edib. 

“Sevil” MTK rəhbərinin vəhhabi təriqətinin nümayəndəsi olması, qanunsuz əməllərdə ittiham edilməsi minlərlə vətəndaşın ev almaq istəklərinin gerçəkləşməsini də əngəlləyəcək. Azından öhdəliklərinin yerinə yetirilməsi illər sonraya ertələnəcək. Bunu söyləməyə əsas verən isə acı praktikadır. “GEN” MMC-də baş verənlər buna misaldır. 7 il əvvəl güclü reklam kampaniyası hesabına vətəndaşları şirkətə cəlb edən “GEN” MMC rəhbəri Elbrus Əliyev nə az, nə çox, 12 milyon manat vəsait toplamışdı. Və sonda bir mənzili, üstəlik, olmayan mənzili bir neçə şəxsə satdığına görə 12 il müddətinə azadlıqdan məhrum edildi. 377 vətəndaş isə bu gün də dövlət qurumlarının qapısını döyməklə mənzillərini tələb edirlər. 

Hazırda “Sevil Massivi”nin ofisinin giriş-çıxış qapıları bağlıdır. Qapılar üzərində “Azərbaycan Respublikasının Baş Prokuroru yanında Korrupsiyaya Qarşı Mübarizə İdarəsi. Zərflər üçün” sözləri yazılan möhür vurulub. 

Ən pisi odur ki, MMC-yə hələ də pul ödəmək üçün gedən müştərilər var. Və onlara ofisin müvəqqəti başlandığını deyirlər. 

Baş Prokurorluğun mətbuat xidmətindən “Sevil” MMC-də baş verənlərlə bağlı hər hansı bir şərh verilmir. 

Mövzunu davam etdirəcəyik.

*   *   *

“Sevil” MTK yazılanlara reaksiya verdi

Ölkə.Az bildirir ki, “Sevil Massivi” MTK-nın ofisindən yazılanlarla bağlı “Yeni Müsavat”a elektron məktub daxil olub. Məktubda deyilir:

“”Sevil Massivi" MTK müştərilərə faizsiz kreditlə torpaq və mənzil əldə etmək imkanı yaradır. Azərbaycanda ilk inşaat sektoru kimi faizsiz kredit şərti ilə minimum qiymətlərlə mənzil və ya torpaq təklif edən yeganə şirkət olaraq təqdim etdiyimiz kommunikasiya xətləri (qaz, su, işıq, kanalizasiya və telefon xətti), sənədləşmə ilə birlikdə müasir bir şəhərcik salırıq. Massivin yaşayış başladıqdan sonra tam infrastrukturla - məktəb, uşaq bağçası, poliklinika, aptek, ticarət mərkəzi ilə təmin olunması əhalinin ehtiyaclarını olduqca rahatlaşdıracaqdır. Müştərilərimiz əldə etdikləri mənzil və ya torpaq sahəsinə ödədikləri qiymətlərdən razıdır, bir çox müştəriyə tam sənədləşdirmə - çıxarış verilib. 

Hazırda “Sevil Massivi”ndə Vergilər Nazirliyi tərəfindən yoxlamalar getdiyi üçün ofisdə və massivdə işlər bir müddətlik dayandırılıb. Qeyd etdiyimiz yoxlama bizim xeyrimizədir, düzgünlüyümüzün və şəffaflığımızın sübutudur. Sənədlərimizin yoxlamadan keçməsi zaman alır və bu zaman ərzində heç bir əsası olmadan yazılan xəbərlər yayan saytlar öz xeyirlərinə əhalinin təşvişə düşməsindən sanki razı qalan insanlardır. Tezliklə ofisimiz fəaliyyət göstərəcək və müştərilər əvvəlki kimi ödənişlərini edə biləcəklər. Əhalinin təşvişə düşməsi üçün heç bir səbəb yoxdur. Məlumat üçün bildiririk ki, Aynur Zeynalov respublikadadır, yazılan xəbərlər tamamilə yanlışdır. Menecer, mühasib və ya hər hansı bir işçimizin tutulması xəbərinin heç bir əsası yoxdur, ofisdə iş başlandıqdan sonra hər kəs əvvəlki kimi işinin başında olacaqdır. Və sonda əhalini bu cür narahat edən xəbərlərə qarşılıq olaraq “Sevil Massivi” MTK olaraq ofisimizin yaxın müddətdə fəaliyyət göstərəcəyini bir daha təsdiq edirik.

“Sevil Massivi” MTK-nın müdiriyyəti" 

Ölkə.Az