"Zərdabinin qarşısında duran problemlərin bir çoxu hələ də qalmaqdadır"

Bu gün Azərbaycan Milli Mətbuatının yarandığı gündür.

Əsası 141 il öncə Həsən bəy Zərdabinin yaratdığı "Əkinçi" qəzeti ilə qoyulan Azərbaycan mətbuatı uzun və keşməkeşli yol keçib. Uzun müddət repressiyalara, təhdidlərə baxmayaraq Azərbaycan mediası bu günlərə gəlib çıxıb.

Milli Mətbuatımız haqda Azərbaycan Jurnalistlər Birliyinin sədri, Ayna.az saytının rəhbəri Elçin Şıxlı Ölkə.Az-a açıqlama verib:

"141 il çox böyük bir yoldur. Tarixə nəzər salsaq, Azərbaycan mətbuatı bir əsr yarıma bərabər ömür yolu keçib, uğurlarımız da olub, uğursuzluqlarımız da. Mətbuatımızda uzun müddət söz azadlığı olmasa da, müstəqillik qazandıqdan sonra bu problem həllini tapıb.

Jurnalistika elə bir peşə, elə bir sənət, elə bir həyat tərzidir ki, mütləq problemlərlə qarşılaşırıq. Hətta Həsən bəy Zərdabinin qarşısında duran problemlərin bir çoxu belə hələ də qalmaqdadır. Jurnalistika var olduğu müddətcə problemlər də həmişə olacaqdır. Bu da təbii bir şeydir.

Bu gün Azərbaycan jurnalistikası təbii ki, inkişaf etməkdədir, ancaq mən daha çox inkişaf və uğur görmək istəyərəm. Ən böyük arzum bu bayram ərəfəsində jurnalistlərimiz işsiz-gücüz qalmasın. Arzu edirəm ki, bütün sular durulsun.

Bütün həmkarlarımı Milli Mətbuat günü münasibətilə təbrik edirəm. Uğurlar arzulayıram. Söz azadlığı, doğru və dürüst söz uğrunda mübarizədə davamlı olaraq mətin olsunlar".

Səxavət Məmməd
Ölkə.Az