"Qarabağ klanı erməniləri və Ermənistan dövlətini girov altında saxlayır"

Artıq bir neçə gündür ki, Ermənistanda bir neçə silahlı şəxs polis polkunu tutub və bir neçə nəfəri əsir saxlayır.

Bu hadisədən sonra Ermənistanda aksiyalar baş verdi. Polislə vətəndaşlar arasında qarşıdurmalar yarandı. Dünən gecə isə polis polkunun bazasını tutmuş silahlılarla erməni polisi arasında atışma baş verib.

Erməni polisinin həmin polis alayının binasını hələ də ələ keçirməməsi müəmmalıdır. Bəzi ekspertlər bildirir ki, erməni polisinin ləng davranışı hesablanmış bir oyundur.

Ermənistanda baş verənlərlə bağlı politoloq Adıgözəl Məmmədov Ölkə.Az-a danışıb:

"İstənilən məsələni təhlil etdikdə baş verən proseslərin kimin əlinə oynadığını başa düşmək lazımdır. Ermənistanda baş verən hadislərə baxdıqda görünən odur ki, bu məsələ kiminsə əlinə oynamaqdan daha çox onu göstərir ki, Ermənistan ictimaiyyətinin içərisində sağlam düşüncəyə malik bir zümrə formalaşıb. Bu zümrə baş verənləri artıq anlayır. Artıq Ermənistanda İrəvan elitası formalaşıb. İrəvan elitası Sarkisyan hakimiyyətinə, Sarkisyan hakimiyyəti isə Qarabağ münaqişəsinə birmənalı baxmır.

İrəvan elitasının həm Rusiyada, həm də Avropa və ABŞ-da çox geniş və sıx əlaqələri vardır. Məhz bu kontekstdə dəyişən dünyamızda, dəyişən reallıqlarda o insanların baş verən proseslərə yanaşma yenilikləri vardır. Dünya dəyişdikcə baxışlar da dəyişir. Müəyyən mühafizəkar fikrə malik olan bir elita ilə, daha mütərəqqi, müasir və baş verən prosesləri düzgün təhlil edən elita arasında bir ziddiyyət var. Bu ziddiyyətin konteksində Ermənistanda hazırkı proseslər baş verir. Son hadisələr iki zümrə arasında silahlı qarşıdurmadır.

Bu gün Ermənistanda Qarabağ müharibəsi dalğası üzərində siyasi hakimiyyətə gəlmiş Qarabağ klanı erməni və Ermənistan dövlətini sanki girov altında saxlayır. Onlara qarşı ermənilər arasında bir hiddət var. Emənistan əhalisində belə bir fikir formalaşıb ki, Dağlıq Qarabağ məsələsi həll olunmalıdır. Sarkisyanın "onlar türkdür, biz tarixən onlarla düşmənik", deməsi ilə məsələni həll etmək olmaz. Ona görə də, Ermənistanda bu cür hadisələr gözlənilirdi, bu hadisələrin bu şəkildə alınması daha ciddi siqnallardan xəbər verir".

Səxavət Məmməd
Ölkə.Az