"Yəqin ki, onu yazan jurnalist…"

“Həmin otelləri hələ tam bitirə bilməmişik”

Azərbaycanın tanınmış iş adamı hacı İbrahim Nehrəmli rəhbəri olduğu “Avesta” konserninin Teymur Əliyev küçəsindəki dəbdəbəli binasının otelə çevrilməsi barədə mətbuatda yayılan məlumatlara münasibət bildirib. 

İş adamı İ.Nehrəmli “Ölkə.Az”-a eksklüziv açıqlamasında deyib ki, yayılan məlumatlar tamamilə yalandır. 

İş adamı bu barədə xəbər yayanlara zarafatla cavab da verib:

“Bu barədə məlumatı bu gün qəzetdə oxudum. Əslində, bu çox yaxşı ideyadır. Yəqin ki, onu yazan jurnalist də bu xəbəri hazırlayanda, mənə yaxşı ideya vermək istəyib. Gərək mən də “Avesta” Konserninin binasını otelə çevirim. Bu yaxşı ideyadır, gələcəkdə bunu nəzərə alaram (gülür – red)”. 

İ.Nehrəmli “Avesta” Konserninin binasını heç zaman otelə çevirmək fikrində olmadığını bəyan edib: 

“Hər gün bu binaya gedib-gəlirəm, bura mənim əsas ofisimdir. Mən oranı necə otel edə bilərəm? Ümumiyyətlə, mənim heç bir otelim yoxdur, otelçilik biznesinə girişməmişəm. Bu sahədə fəaliyyət göstərməmişəm. Ancaq gələcəkdə “Xəzər adaları” layihəsində 2 otelin açılması nəzərdə tutulur. Həmin otelləri hələ tam bitirə bilməmişik. Yaxın illərdə “Xəzər adaları”nda inşa edilən 2 otelin açılışı gözlənilir”. 

Zaur Əziz