"Bunlar hamısı Türkiyəni NATO-dan uzaqlaşdırmaq üçün atılmış addımlardır"

Rusiya Türkiyə ilə hərbi əməkdaşlıq etmək istəyir

Yayılan xəbərlərə görə, Rusiya Müdafiə Nazirliyi Türkiyəyə iki ölkənin hərbçiləri arasında informasiya mübadiləsi etməyə imkan verən kanal yaratmağı təklif edəcək. Təkliflər paketinə informasiya mübadiləsi, eləcə də hava məkanında fəaliyyətə dair protokollar daxildir.

Türkiyədə baş verən 15 iyul hərbi çevriliş cəhdindən sonra Türkiyə ilə Qərbin arasında soyuqluq yaranıb. Hətta Türkiyənin NATO-dan çıxa biləcəyi haqda fikirlər də səsləndi. Rusiyanın Türkiyə ilə yaxınlaşması Qərbi çox ciddi narahat edir. İddia edilir ki, Türkiyə NATO-dan çıxıb Şanxay beşliyinə daxil ola bilər.

Bu məsələlərlə bağlı hərbi ekspert Üzeyir Cəfərov öz fikirlərini Ölkə.Az-la bölüşüb:

"Türkiyənin Rusiya ilə arasında məsafə saxlamasının tərəfindəyəm. Rusiya ilə yaxınlşmaq Türkiyənin həm NATO-da, həm də dünya dövlətləri arasında nüfuzuna çox ciddi xələl gətirəcək. Rusiyanın qeyri-səmimiliyi Türkiyə üçün çox böyük problemlər yaradacaq. Vaxtı ilə Azərbaycandakı Qəbələ RLS-i Rusiyaya verilmişdi, ancaq Rusiya tərəfi əldə etdiyi məlumatları Azərbaycan tərəfi ilə bölüşmürdü.

Rusiya var gücü ilə çalışır ki, Türkiyəni NATO-nun orbitindən çıxardıb, öz təsir dairəsinə salsın. Dünənki milyonluq mitinq bəzilərini çaşdırmamalıdır, faktiki olaraq son vaxtlar Türkiyə silahlı qüvvələri ilə bağlı atılan addımlar Türk dünyasının güclənməsini istəyən insanlar arasında bəzi məyusluqlar yaradıb.

Sabah Sankt-Peterburqda keçiriləcək Rusiya və Türkiyə prezidentləri arasındakı görüşdə Rusiya Türkiyəyə çox şirin vəədlər verəcək. Rusiyanın Türkiyə ilə bölüşə biləcəyi məlumat Suriya konflikti və bir sıra beynəlxalq məsələlərlə bağlıdır. Rusiyanın məqsədi, məramı özünü ilk günlərdən göstərdi. Rusiya bildirdi ki, 15 iyul hadisələri zamanı NATO Türkiyəni məlumatlandırmadı. Bunlar hamısı Türkiyəni NATO-dan uzaqlaşdırmaq üçün atılmış addımlardır. Türkiyə Rusiya ilə münasibətlərində son dərəcə diqqətli olmalıdır. Rusiya səmimiyyət məsələsini diqqətdən qaçırmamalıdır. Rusiya həmin dövlətdir ki, vurulan təyyarə məsələsinə görə az qalmışdı Türkiyənin qanını içsin. Düzdür, Ərdoğan deyir ki, Putin onun dostudur, ancaq mən elə hesab etmirəm. Rusiyanın 25 ildə sərgilədiyi münsibət faktiki olaraq Türkiyəyə qarşı sərgiənmiş münasibət kimi qəbul olunmalıdır. Dağlıq Qarabağ məsələsində Rusiya Ermənistanın tərəfini tutursa, Türkiyəyə qarşı səmimi ola bilməz. Rusiyanın etdiyi təklif bir mərkəzdən idarə olunub. Bu təklif daha çox Türkiyəni tək qoymağa hesablanıb".

Səxavət Məmməd
Ölkə.Az