“Ondan əvəz çıxdım...”
Xəbər verdiyimiz kimi, Rio-2016 Yay Olimpiya Oyunlarında boksdakı təmsilçimiz Kamran Şahsuvarlı yarımfinala çıxıb. Bununla Kamran özü üçün ən azından bürünc medalı təmin edib.
Ölkə.Az-ın məlumatına görə, görüşdən sonra Kamran Şahsuvarlı Gənclər və İdman Nazirliyinin mətbuat xidmətinin rəhbəri Səmayə Məmmədovaya açıqlama verərək hisslərini bölüşüb. İdmançımız son oyunda məhz qazaxıstanlı dünya çempionu Janıbek Alimxanuliyə qalib gəldiyi üçün sevindiyini qeyd edib:
“İndi də özümə inanmıram. Elə bilirəm ki, yuxudayam. İnanmıram ki, bunu edə bildim. Rinqə çıxmamış çox həyəcanlıydım, başımda o qədər fikirlər var idi ki, bilmirdim onunla necə vuruşum.
Sonra gördüm ki, qabağıma gəlir. 3 zərbə vurmalıydım, çalışırdım onu edim. Hələ bu dərəcəyə qədər çatdım çox şükür. Axıra qədər çalışacağam. Qismət... Allah nec yazıbsa elə də olacaq.
Mən Qazaxıstanda yaşayanda, hələ 17 yaşım olanda ona uduzmuşdum. Bu görüşdə də birinci əvəz çıxmaq üçün, ikinci də məni dəstəkləyənləri sevindirmək üçün ona qalib gəldim”.
Kamran Şahsuvarlı “Qəbələ” idman klubuna və müəllimlərinə təşəkkür də edib.
