Hüquq müdafəçiləri: Dağıstanda qadınları sünnət edirlər

Dağıstanın ucqar dağ kəndlərində qadınların sünnət edilməsi kimi vəhşi bir adət hələ də qalmaqdadır.

Ölkə.Az BBC-yə istinadən xəbər verir ki, bu barədə "Rusiya üzrə hüquq təşəbbüsü" fondunun məruzəsində qeyd olunur.

Məruzəçi Yuliya Antonova araşdırma apararkən Dağıstanın kəndlərində olduğunu, lakin qadınların onunla təkbətək söhbətinə kişilər tərəfindən icazə verilmədiyini qeyd edib. Onun sözlərinə görə, yerli hakimiyyət orqanları ümumiyyətlə bu praktikaya qarşı durmağa hazırdırlar, lakin bəzi müsəlman ruhanilər bu ənənənin qorunmasının tərəfdarıdırlar.

Həmçinin bildirilir ki, yer üzündə 125 milyon qadın üzərində bu əməliyyat yerinə yetirilib. Hər il dünyada 3 milyon qız və qadın sünnət olmaq təhlükəsi ilə qarşılaşır.

Böyük Britaniyada həkimlərə və tibb bacılarına belə faktlarla qarşılaşacaqları təqdirdə polisə məlumat vermək tapşırılıb. Britaniyanın özündə də miqrantların gizli şəkildə minlərlə belə əməliyyatlar etdiyi barədə məlumatlar əldə olunub.

Britaniya hökuməti "bu alçaldıcı və təhqiramiz" praktikaya son verəcəyini bəyan edib.

İlhamə
Ölkə.Az