\"Azərbaycan müxtəlif dövlətlərin xüsusi xidmət orqanlarının diqqət mərkəzindədir\"

15 iyul Türkiyədə hakimiyyət çevrilişinə cəhddən sonra Azərbaycanda da Fətullah Gülən tərəfdarlarının qanunsuz hərəkətlərinin qarşısının alınması üçün işlər görülür.

Azərbaycan Baş Prokurorluğunun mətbuat xidmətinin rəhbəri Eldar Sultanov APA-ya bildirib ki, Türkiyədə dövlət çevrilişinə cəhddə ittiham olunan Fətullah Gülənin tərəfdarlarının Azərbaycanda qanunsuz hərəkətlərinin qarşısının alınması məqsədilə Baş Prokurorluğunun Ağır Cinayətlərə Dair İşlər üzrə İstintaq İdarəsində Cinayət Məcəlləsinin müvafiq maddələri ilə cinayət işi başlanıb. Prokurorluq rəsmisi həmçinin qeyd edib ki, hazırda iş üzrə zəruri istintaq əməliyyat tədbirləri davam etdirilir.

Fətullah Gülən tərəfdarları ölkədə nə qədər güclüdür və hansı təhlükə törədə bilərlər? Bununla bağlı politoloq Elşən Manafov Ölkə.Az-a danışıb:

"Nurçularla bağlı daha dəqiq məlumat hüquq-mühafizə orqanlarındadır. Yüksək ranqlı olmasa da, ölkə siyasətinə təsir edə biləcək orta ranqlı məmurlar ola bilər. Zaman-zaman bu məmurların kənarlaşdırılması, onların ölkə iqtidarının mənfi təsirlərinin qarşısını almaq üçün ölçülər götürülüb. Xüsusən də, Türkiyədə baş vermiş hakimiyyət çevrilişinə cəhddən sonra Azərbaycanda dövlət idarəçiliyinin, təhsilin, səhiyyənin müxtəlif sahələrində məsul vəzifələr tutmuş şəxslərə qarşı müəyyən adekvat tədbirlər görüldü. Ölkə təhsilində yüksək imicə malik Qafqaz universiteti bağlandı, ondan əvvəl Araz hazırlıq kursları bağlanmışdı. Mətbuatda çıxan xəbərlərə görə, hətta Prezident aparatının özündə məsul vəzifə tutmuş şəxslərin nurçularla əlaqəsi müəyyənləşdirildi və onlar vəzifədən kanarlaşdırlıdı.

Bütün bunların fonunda həmin insanların, həmin qrumun ölkədəki mövcud vəziyyətə təsir etmək imkanları hələ də qalır. Bununla bağlı müvafiq qərarların qəbul edilməsi ölkə rəsmilərinin, hüquq-mühafizə, xüsusi xidmət orqanlarının işidir, ancaq KİV bu məsələ ilə bağlı öz fikirini bildirməlidir. Mətbuat bu məsələləri gündəmdə saxlamalıdır ki, Türkiyədə yaşanan hadisələr Azərbaycanda yaşamasın.

Etiraf edək ki, Azərbaycan bölgənin güclü dövlətidir. Azərbaycanla bağlı regional və Qərb dövlətlərinin müxtlif geopolitik maraqları var. Azərbaycanda müxtəlif layihələri həyata keçirmək istəyən transmilli şirkətlər var. Bu transmilli şirkətlər təmsil etdikləri ölkələrin xüsusi xidmət orqanları ilə bu və ya digər formada münasibətdə olan qrumlardılar. Bu mənada onlar çalışa bilərlər ki, ölkə iqtidarında onların maraqlarına cavab verən, onların siysətini həyata keçirə biləcək insanlar olsun. Bu mənada Baş Prokurorluğun bu məsələ ilə bağlı cinayət işinin qaldırlıması göstərir ki, ölkə iqtidarında ayrı-ayrı səviyyədə təmsil olunan məmurlar var ki, həmin məmurlar nurçular və ya PKK ilə bağlıdırlar. Bu adamların tutulub zərərsizləşdirilməsi ölkədə sabitliyin və təhlükəsizliyin təmini üçün çox vacibdir.

Baş Prokurorluğun açıqlaması və bu sahədə atılacaq addımları ölkə ictimaiyyəti alqışlamalıdır. Ölkədə iqtidar və müxalifətdən asılı olmayaraq mövcud stabilliyin qalmasında maraqlıyıq. Onsuz da Azərbaycan ciddi bir təhlükə qarşısındadır. Azərbaycanın Ermənistanla müharibə vəziyyətində olması və Azərbaycanın müxtəlif dövlətlərin xüsusi xidmət orqanlarının diqqət mərkəzində olduğunu nəzərə alsaq təbii ki, xüsusi xidmət orqanlarımızın qarşısında mühüm vəzifələr durur.

MTN-lə bağlı son olaylardan sonra bəlli oldu ki, MTN-də ciddi islahatlara ehtiyac var idi. Zamanında xüsusi xidmət orqanlarımızda təmizləmə işləri görüldü. Yəqin ki, bu istiqamətdə bu tipli addımların atılmasını müşahidə edəcəyik.

Səxavət Məmməd
Ölkə.Az