"Ermənistan faktiki olaraq öz silahlı qüvvələrini də Rusiyanın idarəçiliyinə verir"

KTMT-nin Ermənistanda növbəti toplantısı keçirildi.

Toplantıda Rusiya ilə Ermənistan arasında birgə qoşun növünün yaradılması barədə müqavilə imzalanıb.

KTMT-nin toplantısı və müqavilənin mahiyyəti barədə hərbi ekspert Üzeyir Cəfərov Ölkə.Az-a danışıb:

"Onsuz da bütün idarəçiliyi Rusiyanın əlində olan formal dövlət Ermənistan, faktiki olaraq öz silahlı qüvvələrini də Rusiyanın idarəçiliyinə verir. Sergey Şoyqu ilə Seyran Ohanyan arasında birgə hərbi birlik yaradılması barədə müqavilə imzalandı. Rusiya ilə Ermənistan arasında imzalanan sənəddə bildirilir ki, Ermənistanda zəhərli maddələrin dövriyyəsi, onların təhlükəsizliyi ilə bağlı məsələlərə Rusiya ilə birlikdə nəzərət edəcəklər. Düzdür, sənəddə birgə yazılıb, müqavilədə birgə nəzarət ediləcəyi deyilsə də, ancaq faktiki olaraq Rusiya tərəfindən nəzarət ediləcək.

Ermənistanla imzalanan hər sənəd Rusiyanın Cənubi Qafqazda əlinin, ayağının açılmasına hesablanıb. Kollektiv Təhlükəsizlik Müqaviləsi Təşkilatı (KTMT) çərçivəsində keçirilən görüşdə Ermənistan Rusiya ilə birlikdə KTMT-yə daha çox ümüdlər bəsləyir. Amma onların ümüdlərini puça çıxaran Qazaxıstan və Belarus da var. Qazaxıstan və Belarus açıq şəkildə bildiriblər ki, biz Ermənistanın avantürasında iştirak etməyəcəklər.

KTMT-nin baş katibi Nikolay Bardyuja baş-ayaq açıqlamalar verir. Ona da fikir verməməliyik. Prinsip etibarı ilə KTMT-nin baş katibi deyib ki, Ermənistan KTMT-yə öz sərhədləri çərçivəsində ümid bəsləyə bilər. Azərbaycan Dağlıq Qarabağla bağlı hər hansısa bir addım atacaqsa, KTMT-nin orada olması qeyri-mümkündür və bu çox böyük fəsadlara gətirib çıxara bilər. Ermənistanla Rusiya birgə qoşun birlikləri yaradırlar. Bu qoşun birlikləri sabah Ermənistanın hər hansısa bir qanunsuz hərəkətlərində iştirak edə bilər. Ermənistanın Gürcüstana qarşı ərazi iddiası var, Azərbaycanın ərazisini Rusiyanın köməkliyi ilə nəzarət altında saxlayır. Burada Rusiyanın çox məkrli bir məqsədi var. Sabah Dağlıq Qarabağda hər hansısa bir rus əsgəri, zabiti yaralanarsa, başına bir iş gələrsə, bunu hüququ cəhətdən nizamlamaq üçün hüquqi sənəddir. Hüquqi mənada o deməkdir ki, əgər rus əsgərinin başına bir şey gəlsə, deyəcəklər ki, Rusiya-Ermənistan birliyinin əsgərinin başına gəlib bu hadisə. Bu rus-erməni hiyləgərliyinin düşünülmüş məhsuludur.

Bu birgə oyundur. Prinsip etibarı ilə Ermənistan sərhədləri Rusiya tərəfindən qorunur. Rusiyanın 102-ci hərbi bazası 2049-cu ilə kimi Ermənistan ərazisində olacaq. Bu birgə birlik sabah Rusiyanın özünü sığortalamaq üçün ortaya atdığı bir addımdır.

Rusiya digər tərəfi nədənsə nəzərdən qaçırır. Bu gün ruslar BMT-nin işğalçı statusu verdiyi bir ölkə ilə sənəd imzalayırlar. Rusiya əslində Ermənistanla arasında məsafə saxlamaldır".

Səxavət Məmməd
Ölkə.Az