\"Moskva da Bəşər Əsəddən narazıdır\"

İŞİD-ə qarşı həm İraq, həm də Suriyada müharibə aparılır.

İraqda İraq ordusu ilə yanaşı Qərb koalisiyası, Suriyada isə Rusiya, İran və Əsəd ordusu İŞİD-ə qarşı vuruşur. Suriyada İraqdan fərqli olaraq Suriya müxalifətinə qarşı da əməliyyatlar keçirilir.

Rusiya və İran Türkiyəni də İŞİD-ə qarşı mübarizədə onların yanında olmağa çağırır. Maraqlısı odur ki, Türkiyə Suriya problemi başlananda Suriya müxalifətini dəstəkləyirdi. Əgər indi Türkiyə Rusiya və İranla birgə hərəkət edəcəksə, o zaman Bəşər Əsədi dəstəkləmiş olacaq. Bu isə Türkiyənin nüfuzuna zərbə endirəcək, üstəgəl Türkiyə ilə Qərbi üzbəüz qoyacaq.

İŞİD-ə qarşı aparılan mübarizə və siyasi oyunlar barədə politoloq İlqar Vəlizadə Ölkə.Az-a danışıb:

"İŞİD-lə olan cəbhələr təkcə Suriyada deyil, İraqda da mövcutdur. Hal-hazırda Suriyadakı döyüşlər Hələb ətrafında gedir. İraqda isə Mosul ətrafında gedir. İraqda doğurdan da İŞİD-lə müharibə aparılır. Orada kürd peşmərgələri və İraq ordusu İŞİD-ə qarşı vuruşur. İraq ordusu İŞİD-in üzərinə cənubdan, kürd peşmərgələri isə şimaldan və şərqdən hücuma keçib. Suriyada isə tam fərqli vəziyyətdir. Hələbdə aparılan döyüşlərin İŞİD-lə heç bir əlaqəsi yoxdur. Hələb İŞİD birləşmələrinin yox, Suriya müxalifət qüvvələrinin yerləşdiyi yerdir. Orada Rusiya, İran və Suriyanın qoşunları Suriya müxalifəti ilə müharibə aparır. Müharibə hal-hazırda onların xeyrinə getmir. Ona görə ki, birləşmiş müxalifət itkilər verməsinə baxayaraq mövqeylərini bərkidib, bir neçə rayonu ələ keçiriblər.

Türkiyə indi başqa bəyanatlarla çıxış etməsinə baxmayaraq əslində Suriya müxalifətinin tərəfini tutur. Hazırda baş tutan danışıqların mahiyyəti ondan ibarətidir ki, Türkiyənin Suriya müxalifətinə qarşı mövqeyi dəyişsin. Türkiyə danışıqlarda müəyyən şərtlər ortalığa qoyur. Türkiyə-Rusiya münasibətlərində İŞİD-lə mübarizə məsələsi ön planda olmağına baxmayaraq onlar istəyirlər ki, mövqelərdə korrektə işləri aparsınlar. Türkiyə çalışır ki, bu vəziyyətdə nüfuzuna minimum zərbə dəysin.

Sözsüz ki, Bəşər Əsədin hakimiyyətdən getməsi bu məsələdə axırıncı rol oynamır. Rusiyaya yaxın mənbələr bildirir ki, rəsmi Moskva da Bəşər Əsəddən narazıdır. Əsəd qoşunları kifayət qədər məhsuldar vuruşmur. Əsəd qoşunlarının məhsuldar vuruşmaması, Suriya prezidentinin nüfuzunun aşağı olmasından irəli gəlir. Əslində hadisələr necə cəryan edəcək, bunu zaman göstərəcək.

İraqda vəziyyət tamamilə fərqlidir. İraqda doğurdan da Qərb koalisiyası var və onlar mühüm rol oynayır. Qərb koalisiyası İŞİD-lə məhsuldar müharibə aparır. Suriyada isə tamam başqa mənzərə var".

Səxavət Məmməd
Ölkə.Az