Keçmiş təhsil naziri "Fətullahçıların" Azərbaycana gəlməsindən danışdı

Azərbaycanın Dini Qurumlarla İş üzrə Dövlət Komitəsinin keçmiş sədri Rafiq Əliyev Gülən təriqətinin Azərbaycana gəlməsini sabiq prezident Əbülfəz Elçibəyin adı ilə bağlayıb.

Rafiq Əliyev bildirib ki, onlar Azərbaycanda 1992-ci ildən yayılmağa başladılar.

"Bakı Dövlət Universitetində ilahiyyat fakultəsi yaradıldı. Universitet dövlət müəssisəsi idi və burda dini fakultə yaradılması Konstitusiyaya zidd idi. Amma prezident Əbülfəz Elçibəy razılıq vermişdi", deyə Dini Qurumlarla iş üzrə Komitənin sədri professor Rafiq Əliyev vurğulayıb.

Bununla bağlı AXCP hakimiyyəti dövründə təhsil naziri olmuş Firudin Cəlilov Ölkə.Az-a açıqlama verərək məsələyə aydınlıq gətirib:

"Rafiq Əliyevin yəqin məsələdən xəbəri yoxdur. Həmin fakultə Əbilfəz Elçibəyin hakimiyyətə gəlməsindən əvvəl açılıb. O zaman mən baş nazirin müavini idim. O zaman BDU-da Teologiya fakultəsi açdıq. Bu fakultə bütün dinləri öyrənir. İlahiyyat fakultəsi isə elmi fakultədir.

Teologiya fakultəsini açmaq üçün Türkiyə səfirliyəndən xahiş etdim. Dövlət səviyyəsində kömək oldu, o fakultə açıldı və bu gün də fəaliyyətdədir. O fakultəni nurçularla bağlamaq sadəcə məsələnin mahiyyətini bilməməkdən irəli gəlir".

Sabiq təhsil naziri Misir Mərdanovun nurçulara dəstək verməsi ilə bağlı yayılan xəbərlərə münasibət bildirən Firudin Cəlilov bildirdi ki, nurçular yox, fəthullahçılar onun nazir olduğu dövrdən sonra Azərbaycana daha çox gəldilər.

"Fətullahçıların çox gəlməsi Lidiya Rəsulovanın dövrünə düşürdü. Sonra da bu işlərlə maraqlanmadım. Misir Mərdanovun nurçularla, fətullahçılarla əlaqəsi olmamalıdır", deyə sabiq təhsil naziri bildirdi.

Səxavət Məmməd
Ölkə.Az