\"Türkiyəyə təhlükə törədən istənilən təşkilat Azərbaycan üçün də təhlükəlidir\"

Azərbaycanda bir neçə nəfər Fətullah Gülən tərəfdarları həbs olundu

Fəthullah Gülən təşkilatının Türkiyədə etdiyi hakimiyyət çevrilişinə cəhddən sonra Azərbaycanda da bu təşkilatın üzvləri və Fətullah Gülən tərəfdarları barədə cinayət işi açılıb. Artıq DTX və Baş Prokrorluq bir neçə nəfərin həbs edildiyi haqda rəsmi informasiya yayıblar.

Fəthullah Gülən tərəfdarları Azərbaycanda nə qədər təhlükəlidirlər? Bununla bağlı Ümid Partiyasının sədri İqbal Ağazadə Ölkə.Az-a danışıb:

"Təhlükə mənbəyinin nə dərəcədə olduğunu bilmirəm. Çünki, təhlükə mənbəyini bilmək üçün onların nə dərəcədə güclü olub-olmadığını, hansısa əlaqələrə, informasiyalara malik olduğunu dəqiq bilməlisən. Bu barədə informasiyam yoxdur.

Türkiyə ilə Azərbaycanın münasibətləri elə səviyyədədir ki, istər PKK, istər Fətullah Gülən tərəfdarları Türkiyə üçün hansı dərəcədə təhlükəlidirlərsə, Azərbaycan üçün də o qədər təhlükəlidirlər və onlara qarşı adekvat addımlar atılmalıdır.

Onların arxasında kimlərin olması haqda öncədən görməklik etmək istəmirəm. Hüquq-mühafizə orqanları bunu müəyyənləşdirəcək. Konkret adlar ortalığa qoyandan və nə işlərlə məşğul olduqlarını deyəndən sonra onların nə dərəcədə təhlükəli olduqlarını demək olar. Hələ ki, müşahidələr aparırıq".

Səxavət Məmməd
Ölkə.Az