Çingiz Abdullayevin 50 minlik məvacibi, Ramin Musayevin "Neftçi" qisası və fatihə

Futbol üzrə Azərbaycan birinciliyi başladı. Yəni necə deyərlər, onsuz da qara gündə olan futbolumuzun qara günləri. Çempionatla yanaşı mərc kontorlarının fəaliyyəti də işə düşdü, hakimlər isə Bolqarıstanda nə işlə məşğul olduqlarını ilk turdaca Rəhim Həsənovun timsalında nümayiş etdirmiş oldular. Bu arada, PFL prezidenti Ramin Musayevin "pul makinası" da işini xeyli intensivləşdirib, bərəkətli olsun. Elxan Məmmədov isə milli komandadakı "işlərini" qaldığı yerdən davam etdirməyindədir. Əslində, bütün bunlar bildiyimiz futbol həngamələridir. Gəlin sizə yeni mövsümdə baş verəcək yeni həngamələrdən danışaq.

Başlayaq "xalq komandası" adlandırılıb, özü şou biznesə məxsus olan "Neftçi"dən. Bu il ölkə futbolunun flaqmanı, indiki durumda isə iddialı klubların qapazaltısı sayılan "Neftçi"nin 80 illik yubileyidir. Təbii ki, hazırda kluba rəhbərlik edən zehniyyət sahibləri onu daha bir neçə ay qoruyub saxlamağı bacarsalar. Çünki indi flaqmanın idarəçiliyində müəllim, yazıçı, şou-biznes nümayəndəsi, mühasib bolluğudur. Çatışmayan təkcə futbol bilicisidir ki, indiki rəhbərlik belələrini yaxına buraxmamaqda israrlı görünür. "Neftçi"nin veteran futbolçusu Elbrus Abbasovun bu yaxınlarda verdiyi müsahibəni oxumaq kifayətdir ki, komandada hansı cinayətlərə imza atıldığını görəsən. Yeri gəlmişkən, "Neftçinin icraçı direktoru Elnur Məmmədovun İqtisad Universitetindən aralanaraq, Elxan Məmmədovun yanına sığınmasının səbəbləri çoxlarına qaranlıq olsa da, bizə məlumdur. Məmmədovun hansı idarəçi keyfiyyətlərinə görə "Neftçi"də çalışdığı isə hər kəsə sirr olaraq qalır. Təkcə həmsoyadı Elxan Məmmədovdan başqa.

Heç təsəvvür edirsinizmi ki, "xalq komandası"nın rəhbərliyində xalqının dilində danışa bilən insan yoxdur. Bir komandanın icraçı direktorunun əsas işi öz maaşını artırmaq olsun, uduzulan oyundan sonra baş məşqçisi iki cümlə danışa bilməsin... Və bütün bunlardan sonra uğur gözləmək? ABSURD!!!

Görəsən ayına 50 min manat məvacib alan Çingiz Abdullayev və 10 min manat qazanan Elnur Məmmədov "Neftçi"nin Azərbaycan üçün olan əhəmiyyətindən xəbərdardırlarmı?

Dastanlarda deyildiyi kimi, Çingiz Abdullayevlə Elnur Məmmədov hər ay "qatlamaqlarında" olsunlar, sizə kimdən deyim, kimdən danışım, PFL prezidenti Ramin Musayevdən. O Musayevdən ki, "Neftçi"nin 70 illiyində Rövnəq Abdullayevdən sonra komandada ikinc şəxs idi. Lakin buna baxmayaraq, klubun faktiki idarəçisi o sayılırdı.

Musayev ötən yazılarımızda qeyd etdiyimiz kimi, məhz gənc Elxan Məmmədovla mübarizədə uduzaraq, "Neftçi"ni çempion edə bilmədi. Təhqirin birinin bir qəpik olduğu o "məşum" ildə Məmmədov hakimləri xaricdən dəvət etməklə, faktiki olaraq alverin qarşısını aldı və Musayevə pulla çempion ola bilməyəcəyini sübut etdi.

İş elə gətirib ki, indi rollar dəyişib. Musayev çempionatın təşkilatçısı, Məmmədov isə "Neftçi"nin faktiki idarəçisidir. Belə olan halda, Musayev "Neftçi"nin nəinki çempion olmasına, mükafatçılar sırasına düşməsinə imkan verərmi? ABSURD!!!

Axı Musayev özü demişkən, sözünü udmur. Düzdür, bəzən tərsinə də olur. Məsələn, Ramil Diniyevi elə yerdən elə şəxslər tapşırırlar ki, Ramin müəllim dediyindən vaz keçir.

İlk turda AZAL-ın təmiz qolunun sayılmaması və məhz hakimin səhvi ucbatından "Neftçi"nin 3 xal qazanması Musayevi necə əsəbləşdiribsə, "oğlum" adlandırdığı Rəhim Həsənovu da cəzalandırıb. Nədənsə, səhvin ən böyüyünü etmiş Ramil Diniyev yenə sudan quru çıxmağı bacarıb. Hər halda, bu il "Neftçi"nin mükafatçılar sırasına düşməyəcəyi gün kimi aydındır. Burada Musayevin bəxti həm də onda gətirib ki, "Neftçi"nin rəhbərliyindəki şəxslər onun işini asanlaşdırırlar.

Bir anlıq təsəvvür edək ki, Sadıq Sadıqov "Neftçi"nin prezidentidir və Musayev eyni addımı atır. Bilirsinizmi nə baş verərdi? Dərhal Sadıqovun otağında Musayevə tanış simalar peyda olardı... Sonrasını isə həm Sadıqov, həm də Musayev daha yaxşı bilir. Çox güman ki, bu durum daha beş il (Musayevin bu postda qalacağı müddət) davam edəcək.

Bütün bunlardan sonra deyiləcək bir söz qalır. Allah "Neftçi" azarkeşlərinə səbr, idarəçilərinə insaf versin. Bir də qalır mollalıq iş. Çünki ruhu belə öldürülmüş klubun ruhuna fatihə oxumaqdan başqa bir iş qalmır.

P.S. Növbəti yazılarda söz verdiyimiz anonsları araşdırıb, sizi futbolumuzun görünməyən tərəfləriylə tanış etməyə çalışacağıq.

İntiqam VALEHOĞLU
Ölkə.Az