Bakıda Gülən əleyhinə
Bu gün Azərbaycan Mətbuat Şurasında “Dini radikalizmə qarşı medianın rolu: Media və dini cərəyanlar” mövzusunda konfrans keçirilib.
Ölkə.Az-ın tədbirdə iştirak edən əməkdaşının verdiyi məlumata görə, tədbirdə çıxış edən Mətbuat Şurasının sədri, millət vəkili Əflatun Amaşov bildirib ki, Azərbaycanda dini etiqad azadlığı ilə bağlı qanunlar var:
“Ölkədə dini azadlıq kifayət qədərdir. Hər kəs üçün dini azadlıq mövcuddur. Azərbaycan dünyəvi və tolerant dövlətdir. Azərbaycan mətbuatının əsasını qoymuş “Əkinçi” qəzeti də dini tolerantlığı və azadlığı hər zaman yüksək tutub. Azərbaycan mediası dini və digər bütün sahələrdə Azərbaycan dövlətinin yanında olub. Bu gün də bu belədir. Çünki Azərbaycan mediası vətənpərvər mediadır. Azərbaycan mediasında çox cüzi halda dini ayrı-seçkiliyə rast gəlmək olar. Ölkəmizdə dini ayrı-seçkiliyə yol verilmir. Ancaq çox təəssüf ki, bəzi hallada bir sıra KİV-lər tərəfindən dini ayrı-seçkiliyə yol verilir. Son zamanlar gündəmə gələn nurçuluqla bağlı məsələni də bu baxımdan qeyd etmək olar”.
Ə.Amaşov vurğulayıb ki, Türkiyədə baş vcerən 15 iyul hadisələrindən sonra nurçuluqla bağlı məsələ Azərbaycan mediasında da geniş gündəm yaradıb:
“Burada təkcə söhbət nurçuluqdan getmir, eyni zamanda nurçuluğun bir qanadı olan Hizmət hərakatından gedir. Necə ki, Fətullah Gülən hərəkatı Türkiyədə 15 iyul hadisələrini törətdi. Bütün bunlar Azərbaycanı da narahat edir. Azərbaycan ictimaiyyəti bu məsələlərdən doğru məlumatlanmalıdır. Bu gün kiminsə kimdən xoşu gəlmirsə, ona Nurçu, Gülənçi damğası vurmalı deyil. Biz bunu MTN hadisələri zamanı da müşahidə etmişdik. Media bunu ciddi və qərəzsiz araşdırıb, kimin haqlı, kimin haqsız olduğunu cəmiyyətə çatdırmalıdır. Bu günki tədbirimizn əsas məqsədi də bu cür məsələləri müzakirə etməkdir”.
Prezident Administrasiyasının (PA) İctimai-siyasi məsələlər şöbəsinin məsul əməkdaşı Bəhruz Həsənov isə qeyd edib ki, Azərbaycan müstəqillik qazandıqdan sonra dünyaya inteqrasiya etməyə başlayıb.
B.Həsənov deyib ki, Azərbaycanın dünyaya sürətlə inteqrasiya etməsinin faydalı tərəfləri ilə yanaşı, zərəli tərəfləri də olub:
“Bunlardan biri də zərərli dini cərəyanların və ədəbiyyatların ölkəyə transferidir. Bu cür zərəli dini cərəyanlara qarşı mübarizədə təkcə dövlət qurumları deyil, media da fəal iş aparmalıdır. Bu, dünyanın aparıcı dövlət təcrübəsində də var. Bu gün Azərbaycan mediasının əsas istqiaməti əhalini maarifləndrmək, dövlətçiliyi müdafiə etməkdir. Bu baxımdan hesab edirəm ki, Azərbaycan mediası yarandığı gündən bəri maarifçilik, dövlətçilik missiyasını davam etdirir.
Çox təəssüf ki, bu gün bir çix radikal dini cərəyanlar Azərbaycana ayaq açıb. Biz bunu Nardaran hadisələri zamanı da müşahidə etdik. Bu baxımdan da Azərbaycan mediası radikal dini cərəyanlarla mübarizədə fəal olmalıdır. Bu gün bizi narahat edən məsələrdən biri də gündəmdə olan Fətullahçı dini cərəyanı ilə bağlıdır. Bildiyiniz kimi, Fətullahçı dini cərəyanı Türkiyədə 15 iyul hadisələrini törədib. Bu dini cərəyanın nə qədər təhlükəli olduğunu biz Türkiyədə baş verən hadisələrdən görmüşük. Din insanları birliyə, sülhə dəvət etməlidir, seprataçılığa, radikallığa deyil. Bir çox radikal dini cərəyanların əsas meydanı məhz media olur. Bunu Türkiyədə 15 iyul hadisələri zamanı da gördük. Bu baxımdan da Azərbaycan mediası ayıq-sayıq olmalıdır”.
PA rəsmisi həmçinin bəyan edib ki, Azərbaycan Prezidentinin köməkçisi Əli Həsənov Gülən şəbəkəsinin qeyri-səmimi niyyətlərini hələ illər əvvəl ifşa edib:
“Hələ 2009-cu ildə “Dialoq Avrasiya” təşkilatının bakıda təşkil etdiyi tədbirdə hörmətli Əli müəllim Həsənov Fətullah Gülən tərəfdarlarının fəaliyyətinə toxunaraq, onların düzgün yolda olmadığını söyləyib. Həmin tədbirdə əgər iki ölkə arasında dialoqdan söhbət gedirdisə, ilk növbədə bu dövlətlərin qurucuları olan Mustafa Kamal Atatürk və ulu öndər Heydər Əliyevin portretlərini tədbir keçirilən məkanda asılmalı və iki ölkə xalqının münasibətlərini qabartmaq lazım idi. O zaman hörmətli Əli müəllim Azərbaycan dövlətinin rəsmi mövqeyini bəyan etmişdi. Hesab edirəm ki, bu cür zərəli dini meyillərə qarşı media da ayıq-sayıq olmaldır”.
Tədbirdə çıxış edən millət vəkilləri Hikmət Babaoğlu və Musa Qasımlı da Gülənçi şəbəkəsinin Azərbycandakı zərərli fəaliyyətini vurğulyıblar.
Zaur Əziz
