Kılıçdaroğlunu "Twitter"də təhdid edən jurnalist haqqında cinayət işi açıldı

Ölkə.Az Türkiyə KİV-lərinə istinadən xəbər verir ki, FETÖ-çü jurnalist Ergün Babahanın saxlanılmasına qərar verilib.

Buna səbəb jurnalist Ergün Babahanın CHP lideri Kamal Kılıçdaroğluna qarşı törədilən terror aktı cəhdindən dərhal sonra sosial şəbəkəsindəki səhifəsində paylaşdığı fikirlər olub.

"Bu hələ başlanğıcdır. Faşizmə dəstək verən hər kəs bunun əvəzini ödəyəcək. Bu, Kılıçdaroğluna da aiddir", deyə o yazmışdı.

İstanbul Dövlət Baş Prokurorluğunun Mətbuat Cinayətləri Bürosunun prokurorlarından Ümit Təpə jurnalistə qarşı Türkiyə Cinayət Məcəlləsinin "Cinayəti və cinayətkarı təbliğ etmək" maddəsi üzrə cinayət işinin açıldığını bildirib. O, Babahan haqqında saxlanılma qərarı verib. Prokuror Təpə İstanbul Polis İdarəsinin Təhlükəsizlik Şöbəsinə müraciət edərək onun nəzarətə götürülməsi tələbini irəli sürüb.

Xəbər verildiyi kimi, dünən CHP lideri Kamal Kılıçdaroğlunun avtomobil karvanı Artvində polislə terrorçular arasındakı atışmanın ortasında qalıb.

Polislə terrorçular arasında atışma baş verib. Atışma nəticəsində xəsarət alan olmayıb.

İlhamə
Ölkə.Az