Fuad Qəhrəmanlı: "İldə bir nəfər sıravi üzvün partiyadan uzaqlaşması..."
Xəbər verdiyimiz kimi oktyabrın 19-da AXCP rəhbərliyinin toplantısı zamanı istefa hadisəsi baş vermişdi. Elə toplantı zamanı gəldikləri nöqtəni "ürəkağrıdıcı" adlandıran AXCP sədrinin keçmiş müşaviri, Qarabağ qazisi, Milli Azadlıq Hərəkatının fəallarından olan Şakir Abbasov partiya sıralarını tərk etmişdi.
Ölkə.az bu məsələ ilə bağlı AXCP sədrinin müavini Fuad Qəhrəmanlının fikirlərini öyrənib.
Sədr müavini bu cür hadisələrin normal hal olduğunu bildirdi.
"O, partiyanın sıravi üzvü idi. AXCP-yə vaxtaşırı olaraq xeyli sayda insanlar üzv olurlar, ancaq onun da fonunda ildə bir nəfər sıravi üzvün partiyadan uzaqlaşması ümumiyyətlə müzakirə predmeti olmamalıdır. Gələnləri hadisə etmədiyimiz kimi gedənləri də şişirtməyə ehtiyyac yoxdu.
Bilirsiniz,ümumiyyətlə AXCP ətrafında müəyyən hakimiyyət və hamiyyətə bağlı media quruluşları çox istəyirlər ki, ən praqmatik hadisədən xüsusi bir ajiotaj düzəltsinlər. Ona görə də düşünürəm ki, bu tip üsullar, vasitələr artıq ictimai rəydə hər hansı kəpənək effekti belə yaratmır. Yüzlərlə yeni üzvün qəbul edildiyi təşkilatdan, ildə bir dəfə bir şəxsin kənarlaşmasında cəmiyyət üçün hər hansı təsiredici, dəyərdaşıyıcı məna yoxdur.
AXCP bu gün kifayət qədər yetkin komandaya və daxili həmrəyliyə malik olan, partiya rəhbəri ilə üzvləri arasında qarşılıqlı iltimat mühitində olduğu bir təşkilatdır. Elə bunun nəticəsidir ki, məhz kütləvi aksiyaların bu gün əsas donoru, regiondakı mübarizənin əsas ağırlığını üzərinə götürən qurum AXCP-dir".
Şəffaflıq naminə qarşı tərəfin fikirlərini dərc etməyə hazırıq.
Fatimə İbrahimova
Ölkə.az
