İran neft hasilatını artırmaq istəyir

Ölkə.Az Rusiya KİV-lərinə istinadən xəbər verir ki, İranın neft sənayesi naziri Bijan Namdar Zanqane ölkəsinin beynəlxalq neft bazarlarında öz payını artırmaq hüququna malik olduğunu xatırladıb.

Eyni zamanda nazir söyləyib ki, Tehran bazarda tarazlığı qoruyub saxlamaq üçün neft istehsalçılarının istənilən addımını dəstəkləməyə hazırdır.

Zanqane xatırladıb ki, neft bazarında təklif tələbi üstələməyə yeni-yeni başlayarkən İran sutkada 2,7 milyon barel neft istehsal edirdi.

"İstehsal həcmini artıraraq bazarda balansı pozanlar məsuliyyəti öz üzərinə götürməli, istehsalı azaltmalıdırlar",- deyə nazir vurğulayıb.

İrana sanksiyalar tətbiq edilənə qədər ölkə sutkada 3,8 milyon bareldən çox neft istehsal edirdi, bunun 2,2 milyon bareli ixraca sərf olunurdu. 2016-cı ilin yanvar ayından İrana qarşı qoyulan sanksiyalar ləğv edildi.

Ölkə başçısı Həsən Ruhaninin sözlərinə görə, ölkədə hər gün 3,85 milyon barel neft istehsal olunur. Hələlik Tehranın neft istehsalını hansı həcmədək artıracağı dəqiq məlum deyil. Bəzi iranlı məmurların sözlərinə görə, istehsal həcmi sutkada 4-4,2 milyon barelə çatdırıldıqdan sonra hasilatın dondurulması barədə müzakirələr etmək olar.

Qeyd edək ki, OPEK üzvləri bu ilin sentyabr ayında neft hasilatının dondurulması barədə müzakirələr aparacaqlar.

İlhamə
Ölkə.Az