Dollar bahalaşır, neftin qiyməti isə ucuzlaşır
Brent neftinin bir barelinin qiyməti, yeni həftənin ilk iş günündə azalma tendensiyasını qoruyaraq 49,1 dollara qədər geriləyib. Bu gün Brent nefti 1,5% ucuzlaşıb.
Ölkə.Az “Marja”ya istinadən xəbər verir ki, neft cümə günündən qlobal bazarlarda bahalaşan dolların təsiri ilə ucuzlaşıb.
Bu gün Asiya bazarlarında günə 49,55 dollardan başlayan Brent neftinin barel qiyməti azalma tendensiyasını davam etdirərək 49,1 dollar olub və Bakı vaxtı ilə saat 13:30-da 49,20 dollara alıcı tapıb.
Analitiklər, cümə günü ABŞ Mərkəzi Bankının (FED) sədri Janet Yellenin faiz artırımı ümidlərini artıran bəyanatları ilə dolların digər pul vahidləri və əmtəələr qarşısında yüksəlişə keçdiyini ifadə edirlər.
Jackson Hole konfransında çıxış edən FED sədri J.Yellen iqtisadiyyatın Mərkəzi Bankın məqsədlərinə yaxınlaşdıqca faiz artırmaq üçün əsasların də gücləndiyini qeyd edib.
Yellen məsələ ilə bağlı, “Məşğulluq bazarında davam edən güclü hərəkət və iqtisadi fəallıq artdıqca, gələcək aylarda faiz artırımı ehtimalının artdığına inanıram”, - deyə bildirib.
Neft istehsalçısı ölkələrin hasilatı artıracağına dair xəbərlərin də neft qiymətləri üzərində satış təzyiqi yaratdığını bildirən analitiklər, Brent neftinin ucuzlaşmasının davam etməsi halında 48,50 dollar səviyyəsinin əhəmiyyətli dəstək, mümkün yüksəlişlərdə isə 50 səviyyəsinin müqavimət vəziyyətinə düşdüyünü qeyd edirlər.
İranın neft naziri Zanganehin, “Neft bazarında sanksiyalar ucbatından itirdiyimiz bazar payımızı geri qazanmaq haqqımızın nəzərə alınmasını gözləyirik” ifadələri, investorların Əlcəzair görüşünə dair ümidlərini azaldır.
Qərbi Texas növü xam neftin barel qiyməti isə 1,5% azalma ilə 46,9 dollar səviyyəsində qərarlaşıb.
